低調高質西餐鰂魚涌AGE Cuisine Express

喺太古城返工嘅M佬，逢星期二同星期四嘅Lunch都係食我整嘅超好味愛心飯盒，咁唔知佢其他日子通常去邊度食飯呢？為咗揭開呢個謎團，我決定跟蹤佢……（太誇張喇！）我決定叫佢帶我去試吓。所以今日就去到鰂魚涌嘅AGE Cuisine Express，試吓佢平時食開嘅餐廳啦！

洋蔥湯
套餐跟餐湯同餐包，今日嘅餐湯就係充滿洋蔥絲嘅洋蔥湯，洋蔥味好香，仲食到洋蔥嘅鮮甜味，配埋熱辣辣又鬆軟嘅餐包，頭盤一啲都唔求其。

燒安椅格斯牛柳伴蘑菇燒汁
套餐揀咗燒安椅格斯牛柳伴蘑菇燒汁，而牛扒類三成熟係我哋一向嘅選擇，牛肉香濃多汁，口感軟腍嫩滑，以呢到價位嚟講，絕對係超班！而更驚喜係充滿牛肉香嘅薯蓉，薯仔味香濃，加埋蘑菇燒汁，好有層次。

波士頓龍蝦尾海鮮汁扁意粉
另外散叫呢個波士頓龍蝦尾海鮮汁扁意粉，真係必試推介！每條扁意粉都掛上海鮮汁，好creamy好濃郁！仲有一大隻龍蝦尾，新鮮彈牙啖啖肉。

榛子朱古力蛋糕
最後套餐仲有是日精選甜品同飲品，榛子朱古力蛋糕香脆可口，食落有啲似金莎，好有口感，但又凍冰冰，成個人refresh晒，加上唔係好甜，相當唔錯。

AGE Cuisine Express
地址：鰂魚涌英皇道1065號東達中心1104B室
電話：+852 2111 3770
營業時間：星期一至日 11:30 – 15:00、18:00 – 22:00

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！