元朗鮨文Sushi Man 可能係香港最好味嘅Omakase 差啲以為自己去咗日本
A姐同好多香港人一樣,問親佢食咩好,一定係話食日本嘢,無他嘅,日本嘢係好食! 元朗鮨文聽就聽得多啦,主打 Omakase (廚師發板壽司),不過就係未試過。今次終於可以去試下,睇下係唔係真係去咗日本咁!!
嘩!!! 一入到去就見到嗰Sushi bar,成個師傅橦喺你面前整壽司!! 食材每日由日本直送,新鮮到爆,話明廚師發板,就梗係唔新鮮唔食啦! 今日就係由阿信師傅拍板,食咩就睇佢啦!
日本人一絲不苟,每個Details都做到好足,鮨文當然都係啦! 呢度嘅Wasabi係用鮮山葵磨成,味道較淡,帶啲甜味同芝麻味,好鮮味。
食日本菜,當然要配埋Sake啦,你睇下隻Sake杯幾靚!
金萡黑松露茶碗蒸
好啦,有得食啦! 一打開嗰蓋,勁香黑松露味,加埋金萡,靚到無朋友! 日本嘅茶碗蒸一向都係都係好滑,唔係好重蛋味,鮨文嘅當然唔例外。裏面有蝦,有芫荽,加配嗰雞湯嘅鮮味,無得頂!
深海刺魚刺身(炭火網燒)
一嚟到見到件刺身有啲白,好明顯係煮過。原來呢個係刺魚,而阿信話佢係用咗炭火輕輕網燒咗一陣,所以係半生熟。食落真係有陣燶味,好鮮味。
秋刀魚刺身
哈! 秋刀魚唔係燒嘅咩? 你睇下阿信幾快手就去咗啲秋刀魚啲皮,真係快槍手! 配埋青檸汁同薑蓉,唔洗沾豉油就食得。真係好鮮味,質地有啲似劍魚,不過呢個秋刀魚好肥美,啲魚油出晒嚟。
清酒蒸蝦夷鮑魚配鮑魚肝醬
蝦夷鮑魚係黑鮑類,比較凹凸不平。用咗清酒蒸過,食落有淡淡清酒味,非常爽口彈牙,沾埋嗰鮑魚肝醬仲正! 聽講嗰醬好難整,師傅要用成個鐘先整到。
得兩舊鮑魚,啲鮑魚肝醬一定會淨番! 唔洗擔心,我哋係唔會做大嘥鬼㗎! 阿信師傅會送上一球壽司飯,撈埋啲醬食,make sure每一粒都黐到啲醬呀!
伊左目壽司
食完刺身,係時候食壽司啦! 打頭炮嘅係伊左目壽司,係白身魚嘅一種。阿信師傅話配埋上面嘅薑蓉同辣蘿蔔蓉,就Perfect。嘩! 唔好講笑,真係好鮮,絕對無腥味,肉質較淋。
醬油漬櫻鳟壽司
阿信話呢塊係野生櫻鱒魚,係三文魚嘅近親,不過較為高級。就咁睇真係以為係普通三文魚,都係橙色,有啲脂肪,不過魚香味較濃,而且入口即溶,正呀。
北海道點紋牡丹蝦壽司
考下大家點樣分北海道點紋牡丹蝦? 嗱! 我M佬就識吖! 就係靠蝦身嗰四點同頭部兩邊嘅花紋 (哈,都係阿信教嘅,我又會識啦)。你睇下隻蝦,有成隻手掌咁大隻!
救命,真係好肥美呀! 入口比時食嘅蝦黏口好多,食得出佢真係新鮮,仲有淡淡嘅蝦鮮味,真係食到唔可以講嘢,我要好好享受!
活北寄貝壽司
平時食開紅色嘅北寄貝都係熟咗,今次食嘅係活北寄貝!! 食之前,阿信師傅叫我哋唔好影咁耐,一放落枱就要即刻食! 因為阿信會係上枱之前,拍一拍隻活北寄貝,佢就慢慢卷起!! 我哋驚叫完,就即刻食啦! 拍佢嘅原因係等佢嘅肌肉拉緊,食落比較爽口!! 真係好鮮甜同一平時嘅北寄貝無得比。
吞拿魚腩壽司
OMG! 阿信將成大舊拖羅拎出嚟切!! 我可唔可以食晒成舊? 你睇下啲脂肪,真係好似網紋咁,又非常平均,真係好吸引! 食落口真係入口即融,啲魚油香味湧出嚟,真係好正!!
三文魚籽杯
你睇下啲三文魚籽多到就嚟跌落嚟,唔好以為下面啲飯整高佢,真係真材實料咁多,下面啲飯只係得嗰杯咁高。認真講,三文魚籽仲多過啲飯。好鐘意阿信加埋柚子皮碎作配搭,好清新,而且三文魚籽雖係自家浸漬,比時出面嗰啲甜啲。
海膽杯(紫針海膽)
哈! 仲未完呀! 呢個海膽杯都係一樣多就嚟跌晒落嚟。阿信知道我哋好鐘意啲三文魚籽,所以特登加料畀我哋! 呢個海脆杯係用紫針海膽。紫針海膽被譽為日本高級料理中最香甜又兼具海水鮮味的海產之一。食落去膽肉好肥大,鮮味得嚟又帶有少少海水咸味,口感都幾Creamy。啲海膽真係多到啖啖都係海膽多過飯。
羽立海膽(白海膽)
紫針海膽並唔係最勁,原來仲有終極大老 — 白海膽。白海膽顏色較淺,膽身較長,而且更為完整,膽肉就梗係仲肥美啦。入口同紫針海膽完全唔同,非常清新,係甘香清甜,而且口感較結實,海水味較少。阿信話唔係成日有得食㗎,要睇下好唔好彩,因為每年出產唔多。
魚湯
鮨文嘅湯都唔同啲,呢個魚湯真係又鮮又濃,好明顯落咗膠質十足又夠熱熨的精彩魚湯作結,就完成很滿足的一頓。
靜岡蜜瓜
食埋甜品就真係正囉,日本嘅生果一向都出名甜,呢個靜岡蜜瓜啱啱熟,好清甜。阿信話蜜瓜外皮啲紋愈粗愈密,就代表愈甜,下次我識揀啦!
鮨文 Sushi Man
地址:元朗仁樂坊利發大樓5號舖
電話:+852 2285 9477
(記住Like同Share畀朋友)
想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMdiary
Pinterest:AandMDiary
Openrice:A姐M佬
報料或合作:aandmdiaryhk@gmail.com