又到蠔食嘅季節 銅鑼灣牡蠣小屋

又嚟到食蠔嘅最佳季節喇！位於銅鑼灣，超強人氣嘅牡蠣小屋，由日本人打理，主打日式料理，餐廳裝修亦充滿東洋風味，環境寬敞舒適。重點當然係餐廳嘅名物：日本牡蠣（生蠔）啦！呢度嘅蠔非常飽滿，加上依家係蠔嘅收成期，所以更為鮮甜，想食嘅記得要提早預約喇！

牡蠣小屋由日本人主理，除咗餐廳環境設計之外，就連大部份食客都係日本人，佢哋同廚師用日文交流，令我都有剎那間以為自己去咗日本呀！另外，一如餐廳之名，喺門口就放有大量新鮮日本生蠔，未食已經讓人充滿期待嘅感覺。

日本生蠔涮涮鍋
生蠔作為餐廳嘅名物，又點可以唔叫番一個日本生蠔涮涮鍋呢！呢個鍋有6隻生蠔、紅蘿蔔、白蘿蔔、日本大蔥同金菇。生蠔足足有大半隻手掌咁大，蠔身豐滿，漲卜卜，味道超新鮮，非常鮮甜！至於紅蘿蔔、白蘿蔔、日本大蔥同金菇就會索晒湯嘅精華，越煮越好味呀！

特上刺身拼盤
呢個拼盤屬於2人份，有北海道海膽、北海道帆立貝、吞拿魚拖羅、牡丹蝦，同廚師發板嘅3款日本直送鮮魚，今日就有赤鋼、𩶘魚同深海池魚！呢個刺身拼盤絕對係必叫呀！因為CP值非常高呀！首推呢個吞拿魚拖羅，完全無筋，魚肉肥美，接近入口即溶，加上厚切，真係好好味呀！另外，海膽份量超多，而且新鮮有光澤，鮮甜柔滑，完全唔會有苦澀味！牡丹蝦新鮮大隻，非常鮮甜，肉質膠口！整體嚟講，呢個特上刺身拼盤真係好抵食，絕對唔會失望！

串燒
我哋分別叫咗3款串燒，有汁燒雞腎、鹽燒蘆筍豬肉同汁燒茄子！所有串燒都係即叫即燒，每款都非常惹味！其中茄子係我哋首推選擇，上面有好惹味嘅醬汁，甜甜哋，勁好味；至於鹽燒蘆筍豬肉就帶有少少鹹香，口感一流。

牡蠣小屋 KAGURA
地址：銅鑼灣駱克道459-461號The L.Square10樓
電話：+852 2143 5655
營業時間：星期一至日 12:00 – 15:00、18:00 – 23:00

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com