嘆廚師發辦 尖沙咀鮨鳶

晚市嘅堂食終於重開，而M佬亦都履行佢嘅承諾，同我補祝情人節同周年紀念日。要慶祝大節日，最緊要就係食得好，私隱度高同坐得舒服啦！M佬話成年幾冇飛過日本，所以佢就帶我嚟到尖沙咀嘅鮨鳶食廚師發板，滿足一吓返鄉下嘅願望。

餐廳一店兩食，居酒屋嘅部份叫做藏鳶，而我哋今日食廚師發板嘅部份就叫做鮨鳶。鮨鳶嘅座位只有10個，除咗私隱度較高，更重要係方便同廚師互動，令廚師了解你鍾意嘅食材，咁佢嘅發板就更加啱你心水，所以想食嘅就記住要提早預約啦！

麵豉蘿蔔，白子，炸公魚
坐低之後，就送上今日嘅前菜。麵豉蘿蔔冇太多嘅調味，微鹹嘅麵豉加上鮮甜嘅蘿蔔，就夠晒醒胃；一開始我都唔知咩係白子，只知道味道清甜，口感接近入口即溶，正在回味嘅時候，M佬先話我知，原來係魚嘅睪丸，除咗以形補形，更含有豐富蛋白質同維他命D，聽講食完非常養顏；至於公魚炸過之後，夠晒香口。

薄切左口魚
左口魚係兩食，廚師建議先食咗刺身嘅部份，薄切嘅左口魚刺身夠晒透光，絕對係考廚師嘅刀工。左口魚魚香十足，肉質彈牙厚實；相反，炙燒過嘅左口魚邊，油脂豐富，入口即溶，非常滿足。

北海道真蠔
肉質肥美，口感creamy，有獨特嘅甜味，並散發濃濃蠔香。

真鯛刺身
非常新鮮細嫩，彈性十足，口感一流。

馬刀貝刺身
平時一向少食馬刀貝，今日嚟到廚師發板，改變左我對佢嘅觀感，原來馬刀貝甘甜飽滿，肉質豐厚，仲有淡淡的海鹽味。

深海池魚刺身
肉質鮮嫩肥美，脂厚油香，入口魚油甘香細膩，齒頰留香。

三文魚子海膽牡丹蝦
三文魚子嘅份量超多，粒粒飽滿，晶瑩剔透，口感脆嫩，鮮味濃郁；海膽金黃色澤，口感幼滑，充滿海水嘅鹹香，又不失海膽嘅鮮甜；牡丹蝦新鮮彈牙，夠晒膠口。一次過將呢三樣嘢放入口，口感非常有層次。

九州花蟹
食到一半嘅廚師發板之後，就送上呢個九州花蟹。花蟹經過薇薇煙燻，記住加埋旁邊嘅醋啫喱一齊食，蟹肉嘅鮮甜味更加突出。

茶碗蒸
蛋好滑溜，仲有蝦肉同冬菇增加口感。

壽司八貫
活赤貝、右口魚、赤身、活北寄貝、鯖魚、海膽等八款壽司。其中北寄貝同赤貝就最吸引，上枱嘅時候，仲夠生猛，肉質爽口彈牙，非常鮮甜；而炙燒過嘅右口魚，油香十足，入口即溶；當然唔少得海膽啦，最估唔到係呢個餐入邊，海膽係會出現第二次，好滿足呀！

燒呑拿魚鮫
油香十足，肉質亂畫，簡簡單單用鹽燒，就識到佢嘅原汁原味。

抹茶奶凍
今日嘅食物由淡至濃，最後就以抹茶奶凍作結。奶凍夠香滑，抹茶味香濃，係一個完美嘅句號。

鮨鳶 Sushi Tobi
地址：尖沙咀加拿芬道44-46號地下6號舖
電話：3462 2353
營業時間：星期一至日 12:00 – 23:00

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com