嘆高質晚餐 觀塘Bella Shine

觀塘嘅日與夜分別真係好大，夜晚嘅觀塘，除咗多了一份寧靜，仲加添一份好味呢！話說觀塘俾唔少人嘅初感覺都係工廠林立，有好多茶記同快餐店，但其實尋求高質又有誠意嘅西餐，觀塘都有Bella Shine！觀塘嘅Bella Shine近期因推出90分鐘牛扒任食，而人氣高企。但其實餐廳嘅選擇非常多，我哋今日想咩都食啲，所以就叫咗A La Carte，非常有驚喜！

香橙蟹肉甘筍薑湯
今日嘅餐湯有2款選擇，其中一款係香橙蟹肉甘筍薑湯，湯底嘅甘筍味突出，帶出湯嘅香甜；湯入面又有絲絲蟹肉，增加口感！另外，湯嘅薑味係靈魂所在，夠晒健胃暖胃。

黑松露忌廉蘑菇湯
黑松露忌廉蘑菇湯絕對係最完美嘅配搭！蘑菇磨得細滑，入口柔順，而且菇味濃郁；再喺蘑菇湯入面加入黑松露，令湯更香更有層次！跟湯仲有蒜蓉包，非常香脆而蒜味香濃。

日式蟹膏拼麻辣三文魚慕絲跟竹炭西多
首先，竹炭西多烘得好似餅乾咁香脆！食之前可以加上日式蟹膏或麻辣三文魚慕絲作配料，兩款各有特色，其中日式蟹膏嘅蟹味甘甜鮮美，香濃而不鹹；而麻辣三文魚慕絲嘅麻味非常香，好有層次，一試難忘。重點係兩款醬料超多，食晒啲竹炭西多，仲有好多醬料剩，好大方呀。

前菜拼盤
呢個前菜拼盤有3款小食，分別係：鰻魚鍋巴、麻辣藕片沙律同泰式赤蝦刺身，喺呢個小小嘅拼盤入面可以一次過試到唔同國家菜系嘅味道，確實好有驚喜！鰻魚鍋巴嘅鰻魚汁香甜，魚肉無泥味，鍋巴脆口，非常開胃；而蓮藕片嘅麻辣味十足，香而微辣，藕片夠爽口，非常醒胃；最後，泰式赤蝦刺身嘅泰式醬汁酸酸甜甜，令人好開胃，而蝦身大大隻，蝦膏份量多，好鮮甜。

荔枝豬腩肉串燒
Bella Shine雖然無酒賣，但可以自己帶酒上餐廳而唔收開瓶費呀！不過，飲酒又點少得叫啲串燒呢？餐廳有多款串燒選擇，其中我哋大力推介嘅就係荔枝豬腩肉串燒喇！豬腩肉一層肥一層瘦，但燒過嘅豬腩肉，油份被迫出，油膩感大減，加上串燒內亦加上荔枝，增添一份鮮甜味，味道好有層次！

香茅燒豬頸肉
豬頸肉燒得乾身，所以係脆邊架！豬頸肉軟腍，香茅味香濃，唔錯！

軟殼蟹天婦羅鹹蛋黃扁意粉
每條扁意粉都掛上鹹蛋黃醬，仲有粒粒鹹蛋黃架，真係好邪惡但又好好味呀！軟殼蟹炸得好香，蟹肉嫩滑仲帶有微微嘅蟹膏香。份量好多，share就最啱啦！

花尾龍蠆西京燒伴藜麥
必叫！必叫！必叫！重要嘅嘢講幾多次都無用，最緊要係行動呀！呢個花尾龍蠆非常厚身，魚肉嫩滑，無骨啖啖肉架！而魚皮下面嘅油脂豐富，令人非常滿足！重點當然係西京燒汁啦，將整個花尾龍蠆西京燒提升至另一層次！伴碟除咗藜麥，仲有翠玉瓜、茄子、薯蓉等等，整個擺盤非常靚！

岩鹽焦糖厚焗鬆餅
一個豐富嘅晚餐又點少得甜品呢？呢個岩鹽焦糖厚焗鬆餅即叫即焗，想食嘅就要提早少少order喇！鬆餅外表香脆，入面軟綿綿，充滿空氣感，creamy得嚟又不會太飽肚。

Bella Shine
地址：觀塘巧明街114號迅達工業大廈2樓B室
電話：+852 2345 8455
營業時間：星期一至日 12:00 – 15:00、18:00 – 23:00

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com