大埔成仔記 我細細嗰已經食佢
M佬雖然成日話自己唔浪漫，不過佢九唔九都真係幾sweet。今日，佢話要帶我去佢嘅成長地 – – 大埔，體驗一下佢細個嘅生活，行番佢以前行過嘅路。嘩！有無咁浪漫呀？！把口浪過油！
M佬中學嗰陣為咗儲錢買波鞋，Lunch time就會走去食碗鮮蝦雲吞麵，有時加杯豆漿，咁就一餐。食過咁多間，都係最鐘意成仔記。
雖然佢已經搬咗去大少少嘅新舖，不過M佬話同舊時嘅風味一樣，照舊係無咩特別嘅裝修，紅底黃字嘅招牌，仍然係唔興寫單，食完起身，樓面姐姐就會大嗌收幾多錢，十分懷舊。
M佬話佢細個同姐姐鬥快計數，有一次姐姐爆響口話佢地原來會預先喺在心入面計定數，費時臨急臨忙計錯數或者計唔切！
所謂貴精不貴多，成仔記無其他魚蛋粉舖咁多選擇，得雲呑、牛肉、鯪魚球、墨丸、牛丸五樣野揀。其中最出名嘅就係人手包嘅雲吞，粒粒入面都有隻蝦，足料新鮮。M佬話以前奶奶（哈！口快快叫咗做奶奶添，我唔係咁恨嫁㗎！）會外賣生雲呑返屋企打邊邊。
另一鎮店皇牌就係鮮牛肉，佢地堅持唔用調味料醃，保持牛肉嘅鮮味。齋食可能會覺得比較淡，加埋醋同辣椒油就啱啱好，吊哂啲牛肉鮮味出嚟。
其實我食魚蛋粉係為咗食辣椒油，呢到嘅辣椒油雖然唔係超辣，但勝在夠香，即刻加分！
M佬成餐喺到話當年，唔知我哋百年歸年嗰陣，會唔會都去返我哋食過餐廳回味一下？
成仔記麵食
地址：大埔安慈路3號翠屏花園商場地下20號
電話：+852 2680 4692
營業時間：星期一至日: 09:00-20:00
（記住Like同Share畀朋友）
想緊貼A姐M佬嘅玩樂資訊，快啲Follow埋下面嘅Channel啦！
Facebook：AandMDiary
Instagram：AandMdiary
Pinterest：AandMDiary
Openrice：A姐M佬
報料或合作：aandmdiaryhk@gmail.com
