活在這忙碌的小城 慶幸此年代還有你 食環境嘅小城年代New Town Cafe 1884
喺呢個繁忙嘅小城入面，每日都營營役役，返工就等收工，收工當然要食番餐享受吓啦！今日就同A姐坐吓地鐵，去到開咗無耐嘅黃埔站，睇吓有咩好味推介啦。
呢間位於黃埔嘅小城年代，餐廳嘅環境格局相當唔錯，特別係用上藍色嘅海洋系色調，令到成個人都好relax呀！
呢度嘅2人晚餐（$349），就可以揀選2款前菜同4道主菜，仲有餐飲同餐湯，價錢睇落都好實惠！
忌廉蘑菇粟米餐湯
鐘意飲湯嘅我哋，就梗係食晒啦！啖啖都會食到打碎咗既蘑菇，又香濃又滑，好好味㗎！
美國鐵筒薯條配黑松露蛋黃醬
熱辣辣嘅薯條炸到金黃色，炸到脆卜卜，不過，個黑松露醬就失色少少喇，唔係好香黑松露味。
法式田螺拼薯蓉
遠遠已經聞到好香嘅薯蓉味，焗得啱啱好，薯蓉好軟綿綿，配合埋濃郁嘅田螺，都唔錯呀。
菠菜酥皮焗三文魚
被菠菜同酥皮包住嘅三文魚，焗完之後，入口好鬆脆，三文魚嘅鮮味同水份都keep得幾好，好有層次。
扒法國走地春雞
半隻法國走地春雞，size唔太大，因為係走地嘅關係，肉質勁滑，又有咬口，皮都算香口，忍唔住食晒啲皮。
烤澳洲鮮草飼肉眼扒
5成熟，烤得啱啱好！牛味香濃，以呢個價錢，牛嘅質素都算唔錯。
蒜香煎深海花虎蝦
虎蝦大大隻，夠晒爽口彈牙，加埋啲蒜蓉味，鮮味出晒嚟。
2人餐仲包埋飲品，特飲就要另外加錢。以價錢嚟講，雖然唔算好貴，但份量唔多，稱不上抵食。但純粹以環境同味道嚟講，確實不錯！
小城年代 New Town Cafe 1884
地址：紅磡黃埔新天地奇妙坊G6B號舖
營業時間：星期一至日: 08:00-22:00
電話：+852 2790 6328
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
報料或合作：aandmdiaryhk@gmail.com
