早餐由一個劣食開始 北角渣華道協成粥品
夜晚嘅渣華道市政大廈，真係有邊個唔識東寶吖！咁朝早呢？
朝早點可以唔食早餐吖！我同M佬上去熟食中心睇吓有無茶檔，諗住食番碗沙嗲牛肉麵，點知，原來朝早嘅渣華道市政大廈選擇有三：1間粥店、再1間粥店同1間食中式點心嘅餐廳。行過見到呢間粥店嘅婆婆負責拉腸粉，大女煮緊粥，細女就處理樓面工作，仲有唔同嘅女工負責唔同嘅部份。當我哋經過協成粥店時，佢哋都好落力叫我哋坐低，有粥有飯有麵，結果，感受到佢哋嘅熱情同人情味之後，我哋決定一試！結果……
炸兩
我A姐去粥店每次嘅必點，一定係炸兩！因為腸粉皮軟淋淋，入面嘅油炸鬼脆卜卜，加埋唔同嘅醬汁真係好好味㗎！而呢度嘅腸粉同油炸鬼係卷唔實，食嘅時候會散晒都算，個油炸鬼係硬到咬唔開，所以真係好失望。
艇仔粥
艇仔粥最大賣點係多料，但粥底米少唔綿，而且成碗嘅豬皮都唔食得，全部都有陣怪味，好驚。
煎蘿蔔糕
同上面兩樣相比，蘿蔔糕算係相對好味。軟軟綿綿，但蘿蔔絲極少。
呢間小店賣嘅係人情味同平嘅價錢，但我同M佬食完都有少少肚痛！不過，如果你都想挑戰嘅，不訪一試。
協成粥品
地址：北角渣華道市政大廈2樓
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
報料或合作：aandmdiaryhk@gmail.com
