最期待嘅酒店早餐 金鐘奕居Salisterra

喺奕居嘅Staycation體驗真係非常滿意，所以瞓醒之後，我哋都好期待去到奕居頂樓嘅Salisterra食早餐。Salisterra嘅早餐雖然唔係自助形式，但份量都唔少，分為中式、日式、英式、素食同冷肉盤五款定食早餐。如果想坐到窗口嘅海景打卡靚位，建議就要朝早8點半之前上嚟喇！

奕居Staycation入住情報：Tripadvisor香港第一的酒店 全港最奢華的品牌：奕居

Salisterra早餐：中式早餐
M佬話西式早餐都係煎雞蛋同腸仔，想有特色嘅就梗係要叫中式早餐啦！呢個中式早餐有點心，又有粥同炒麵，真係考廚房功架。首先點心有蝦餃、燒賣、叉燒包同蘿蔔絲酥餅，首先蝦餃嘅蝦超大粒，又彈牙，好味；至於燒賣就正正常常，但上面放有好多魚籽，令口感大增；反而蘿蔔絲酥餅就係我嘅最愛，外層超鬆化，入邊有絲絲蘿蔔，口感一流。另外，中式早餐仲有香葱鮑魚雞絲粥，不過，鮑魚就切咗粒粒，份量唔多，粥嘅味道普普通通，好彩有條香脆嘅油炸鬼補數。至於，銀芽肉絲炒麵都唔錯，入面加入豬肉一齊炒，唔會太油膩，但加入咗肉香，確實唔錯。最後，早餐仲有鮮榨果汁、咖啡或茶，整體嚟講，都夠晒飽肚豐富。

Salisterra早餐：日式早餐
除咗中式早餐，我哋另一款就叫咗日式早餐。前菜有豆腐、醃蘿蔔、牛蒡、醃海藻絲同香菇等等，全部食物都非常健康，味道清新。至於麵豉湯唔會太鹹，入面有豆腐同海帶，味道香濃。至於配白飯嘅主菜就係香煎三文魚，三文魚嘅魚皮煎得香脆，口感脆卜卜，至於魚肉好嫩好滑，魚味香濃，油香十足。最後，早餐仲有鮮榨果汁、咖啡或茶，非常豐富。

Salisterra
地址：金鐘金鐘道88號太古廣場奕居49樓
電話：+852 3968 1106

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com