未來皇太后駕到 觀塘私房菜御膳

常言道：要留住一個男人，就要先留住佢個胃！但我A姐永遠都會輸畀呢個女人，佢就係我嘅未來皇太后 — M媽！M媽煮嘢食好拿手，連我減肥中都會忍唔住添多碗飯。所以M媽話：要留住未來新抱，就要先留住佢個胃！！今日約埋M媽食飯，我都唔敢獻醜露兩手，都係搵間口碑唔錯嘅私房菜，今次嚟到觀塘御膳，連M媽都話好得。

香芒沙律大蝦球

蝦球夠爽口彈牙，最正係唔會炸得太乾，蝦球下舖滿沙律菜同大量新鮮水果，如蘋果、藍梅、芒果、士多啤梨等，唔膩又好開胃啊！

薑沖炒大肉蟹

M媽同M佬就最鍾意食蟹，所以這個菜，佢哋嘅要求就靈舍高！佢哋話呢隻蟹好驚喜，用薑沖炒將蟹嘅鮮味大大提升，肉質鮮嫩而肉汁無流失，足以證明蟹夠晒新鮮。

生煎東星班

好哋哋一條12両重嘅東星班攞嚟煎？M媽雖然係咁講，但就食得最多！因為開邊煎到外脆肉滑，啖啖魚肉點上甜鼓油夠開胃！

白胡椒爆炒南非鮑魚

呢個鮑魚係我哋一致認為全晚最難忘嘅菜式！平時一般鮑魚都係蒸或炆，呢度就攞嚟炒，仲要出奇咁好味！白胡椒微微嘅香辣，好惹味，而爽口嘅鮑魚索晒啲汁，完全Perfect Match！

蒜蓉粉絲蒸蟶子王

手掌咁大嘅蟶子王爽口鮮甜，又無沙，蒜蓉味道夠香濃入味，當然唔少得精華所在嘅粉絲啦。

江南百花雞

上枱一刻仲以為係素雞，原來係將蝦膠釀入去骨嘅雞肉上面，做出唔同嘅層次同口感！雞肉嫩滑配上彈牙蝦膠，好特別，完美合一﹗

上湯浸時菜

食咗咁夠海鮮，清清哋食個上湯浸時菜，有雜菜同什菌，簡單又好味。

招牌御膳炒飯

最後呢碟炒飯夠鑊氣，炒得乾身惹味！配料有帶子同牛肉，唔錯！

甜品：雲呢拿布甸

淡淡的雲呢拿香，布甸夠滑，好滿足呀！

御膳 Imperial
地址：觀塘敬業街65-67號敬運工業大廈12樓F室
營業時間：星期二至日及公眾假期 18:00 – 00:00
電話：+852 3575 9567

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
報料或合作：keepintouch@aandmdiary.com