東南亞風味自助餐 嘉里酒店大灣咖啡廳
放暑假除咗一家大細去旅行，就梗係要食餐好架啦！而且如果有慶祝活動，好似生日、拍拖紀念日、週年紀念、考第一，香港人都特別鍾意食buffet慶祝！所以我哋一家大細就去到嘉里酒店嘅大灣咖啡廳，今期buffet以東南亞美食為主題，馬來西亞、泰國、新加坡、越南同印尼嘅菜式都有，真係要由lunch開始留肚先得呀！
我哋特登提早訂位，預留咗一個靠窗嘅卡位，座位寬闊又舒適，而且望住個海景真係好寫意！而呢度嘅buffet有海鮮冷盤、刺身、前菜、各種熱葷、車仔麵同甜品等等，食物選擇超多！以咁多選擇嚟講，價錢一啲都唔貴，星期日至四，成人$648，小童 （5-11 歲）$324；星期五至六及公眾假期，成人$698，小童 （5-11 歲）$349。仲可以加錢升級無限添飲套餐，由最平嘅任飲汽水同果汁$40套餐到有香檳任飲嘅$300套餐。
海鮮冷盤
海鮮冷盤選擇有蟹腳、蟹鉗、青口、蝦同龍蝦等，全部都好新鮮，仲帶有淡淡嘅海水味。首推係大大隻超多膏嘅龍蝦，食多幾隻都夠回本啦！另外，細心位係蟹鉗預先開殼，一啖咬落去，幸福感爆晒錶！值得一再encore！
刺身
刺身貴精不貴多，有三文魚、鯛魚、吞拿魚同八爪魚，另外，仲有唔少壽司選擇。
生蠔
生蠔當然係即開啦，但細心位係唔駛排隊，由店員直接送上枱，服務細心加晒分！而生蠔帶有淡淡嘅海水味，超鮮甜。
新加坡辣椒蟹
話明係東南亞風味自助餐，又點少得新加坡辣椒蟹！醬汁超濃郁，甜辣適中，蟹肉結實而且完全入晒味，回味無窮！
泰式香辣燒春雞
燒春雞嘅皮燒到脆卜卜，雞肉嫩滑！
泰式蝦球
蝦球大隻彈牙！配上獨特嘅醬汁，好醒胃。
泰式蒸魚
魚肉起咗骨，食得夠方便。
泰式炒蜆
蜆肉粒粒漲卜卜，鮮甜味十足。
燒魚
魚肉超滑，魚油豐富。
燒蠔
燒蠔上面鋪滿唔同香料，燒到熱辣辣，入晒味。
泰式炒河粉
炒河粉係泰國名物，呢度又點少得呢，呢個炒河粉炒得夠晒鑊氣！
串燒
串燒有雞肉同牛肉，燒得夠乾身，再點埋秘制沙嗲醬，真係好惹味。
木瓜沙律
沙律選擇好多，而以東南亞風味為題，又點少得木瓜沙律呢？呢度嘅木瓜沙律仲要係即叫即製架！
除咗以上嘅推介，酒店仲會不時轉變菜單，好似會有香煎蠔仔餅、燒巨型河蝦、燒手釣黄鰭吞拿魚扒、越式三文治、惹味沙嗲蟹、龍蝦叻沙、泰式大蝦沙律、馬拉炒粿條、香茅虎蝦冬陰功、泰式炒豬頸肉等等，真係每次都會有新鮮驚喜。
燉湯
今日嘅燉湯係椰子燉烏雞，椰子味超香濃，無加味精，真正係媽媽嘅營養燉湯。
小籠包
係會爆汁架！係會爆汁架！係會爆汁架！重要嘢要講3次。
印度咖哩
咖哩選擇好多，不過我哋太飽喇，下次再試。
越南河粉
配菜可以揀肥牛、韭菜、鮮魷同各種蔬菜，而湯底都有牛肉湯、豬肉湯同雞湯三種，自由配答你嘅越南河粉。
熱葷選擇仲有好多，包括燒肉眼同韓式五花腩等等。
巴馬火腿
我哋另外upgrade咗飲品放題，所以餐酒配巴馬火腿就啱晒喇。
水果
記住要留肚食水果！呢度嘅水果，由泰國同馬來西亞等地新鮮直送，包括大樹菠蘿、山竹、紅毛丹、龍眼同火龍果等等，而且仲有每人一份嘅新鮮榴蓮，估唔到可以喺室內地方嘆住冷氣食榴蓮！
甜品
呢度有唔同種類嘅蛋糕，青檸菠蘿、熱情果紅桑子、芒果榛子脆脆、朱古力焦糖、意式奶凍、杏仁朱古力忌廉等等。
朱古力噴泉
呢個朱古力噴泉用上越南70%朱古力，夠晒香濃。
芒果糯米飯
東南亞風味自助餐，又點少得芒果糯米飯！
雪糕
八款唔同口味嘅gelato同雪葩：朱古力、雲呢拿、士多啤梨、椰子等等。
香港嘉里酒店 – 大灣咖啡廳 Kerry Hotel Hong Kong – Big Bay Cafe
地址：香港九龍紅磡灣紅鸞道38號香港嘉里酒店3樓
營業時間：06:00-10:30（早餐）、12:00-14:30（午餐）、18:00-21:30（晚餐）
電話：+852 2252 5246
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
報料或合作：keepintouch@aandmdiary.com
