款式多高質中餐 調景嶺金公館

近排我個肚腩凸咗出嚟，A姐話我升呢成為大叔喇！為咗希望唔好再升級，所以我近期去咗跑步，不過，對我嚟講，跑步都唔係為咗減肥，只係為咗減少下一餐嘅罪惡咁，哈哈！今日就嚟到調景嶺嘅金公館，呢度粵菜、川菜、京菜都有，款式多而且質素都唔差，又可以放肆大食一餐。

青椒黃金皮蛋
蛋黃有溏心感覺，而蛋白金黃透明，充滿彈性。口感又軟又彈，加埋青椒一齊食，又辣又香，非常爽口開胃。

蒜泥白肉
呢度嘅蒜泥白肉好啱我口胃。首先賣相一流，因為出面好多蒜泥白肉只係放一大pat蒜蓉喺面就算！另外，佢嘅蒜蓉份量啱啱好，加上放有青瓜，充滿口感，而味道又唔會太蒜太濃。

麻辣水煮魚
落單嘅時候，職員細心提醒，呢個可能會比較辣，但食嘅時候，我哋又覺得好辣，反而帶有麻香味，層次非常豐富。水煮魚嘅魚片份量唔少，但略嫌魚片有唔少骨，食嘅時候要小心。其他配料仲有鴨血、萵筍、薯粉同芽菜等，全部都夠晒入味。

鳳梨咕嚕肉
本身諗住水煮魚比較辣，就叫個酸酸甜甜嘅鳳梨咕嚕肉中和一吓啦！咕嚕肉表面非常香脆，而肉質嫩滑，形成對比嘅口感，加上酸酸甜甜嘅醬汁，非常好味！

竹笙鼎湖上素
鼎湖上素俾人嘅感覺就係大量生菜囉，但呢度嘅竹笙鼎湖上素，除咗竹笙同菜心之外，佢嘅主要材料都係菇，菇嘅款式好多，加上蠔油嘅炆煮，好惹味！

五代同堂炒飯
五代同堂即係包括蝦子、櫻花蝦、蝦米、蝦乾同鮮蝦嘅五種蝦。炒飯炒到乾身，粒粒分明，另外欣賞餐廳將炒好嘅飯放入一個熱鍋上，除咗可以保持飯嘅乾身同溫度之外，亦有飯焦，增加飯嘅焦香味同口感。至於五款蝦嘅份量都非常多，成個飯都充滿蝦嘅香濃味。

金公館 Jin Gong Guan
地址：將軍澳調景嶺彩明街1號彩明商場2樓251-252號舖
營業時間：星期一至日 07:00 – 23:00
電話：+852 3905 2035

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com