港式西餐，焗薯、酥盒ichiban嘅旺角意歐

身為女人，但真係好唔鐘意行女人街，因為呢條街已經變節喇，根本就係大媽街！所以點會啱好似我呢啲咁高貴又靚嘅A姐吖！不過，條佬話要帶我去食啲又平又好味嘅西餐喎，咁我今日就一於深入“大媽街”，試吓呢間意歐啦！

講真，門口唔算好富麗堂皇，亦唔係行簡樸文青風，不過，地道嘅設計更顯得同女人街互相輝映！

唔知大家鐘意紅定白呢？酒？唔係呀，我講緊嘅係湯呀！喺意歐就一定要點白湯喇，一放上台就已經聞到濃濃嘅黑松露香味，真係夠哂矜貴！

飲湯又點少得配返個包呢？不過，喺呢度記住點番個”小小酥”嚟襯番個湯喇！呢度嘅”小小酥”有多款口味，我哋就叫咗黑松露蛋碎酥盒同巴馬芝士火腿酥盒，真係同個湯絕配！！

喺食主菜前，又點少得小食前菜呢？！呢度除咗酥盒出名，另一個好評就係焗薯，今次呢個蟹籽蟹腳柳沙律焗薯，沙律凍凍哋配合埋熱辣辣嘅焗薯真係冰火交纏！好好味呀！

至於主菜方面，我哋叫咗蒜辣軟殼蟹燴墨魚麵同豬手。墨魚麵夠哂濃味，完全吸收哂墨魚嘅精華，仲有成隻新鮮炸起嘅軟殼蟹，超級香口。配埋下面嘅醬油香菇，正；至於豬手就炸到脆卜卜，夠哂juicy！

最後，食西餐就最怕溜，所以就叫咗個黑醋水果拼盤為呢餐飯畫上完美嘅句號！

講真，好味嘅西餐廳多的是，但以呢個價錢嚟講，性價比絕對係高，下次行開旺角，不妨試試啦！

Cafe Retour 意歐
地址：旺角通菜街6號
營業時間：星期一至日: 12:00 – 00:00
電話：+852 2668 6722

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬玩樂日記

Instagram：AandMdiary

Pinterest：AandMDiary

Openrice：A姐M佬