港版芭提雅 石澳石澳泰
講到泰國熱門嘅旅遊點又點少得芭提雅呢？仲記得以前啲泰國曼谷旅行團，點都會留喺芭提雅玩番兩至三日，輕輕鬆鬆享受泰國嘅假期。今日我哋嚟到石澳，呢度同樣有芭提雅嘅感覺！石澳嘅沙灘水清沙幼，近停車場嘅位置有唔少沙灘用品店鋪，仲有串烤店，真係陣陣泰國風情！因為我哋想搵間餐廳坐低慢慢嘆吓，所以就嚟到石澳泰。
小食拼盤
我哋兩個人就叫咗一個細嘅小食拼盤，拼盤嘅每一款小食都有兩件，兩個人share食就啱啱好！炸蝦唔用炸粉，改用粉絲包住再炸，原來口感會更豐富；泰式炸魚餅加入唔少香料一齊炸，所以味道好有層次；至於脆炸蝦餅蝦味濃郁，超級彈牙；香葉包雞雖然細細舊，但就好入味喇；最後，仲有炸素春卷，春卷焰料勁多，夠晒鬆脆。
泰式炒通菜
即叫即炒，通菜帶有少少辣，非常惹味。
海鮮菠蘿炒飯
同平時嘅菠蘿炒飯好唔一樣，因為佢唔係將炒飯放入開邊菠蘿，反而係放喺旁邊，咁樣食嘅時候反而相對方便。個炒飯好有鑊氣，海鮮配料有鮮魷同蝦，整個炒飯份量一啲都唔少架！
海鮮濕炒河粉
但更令我哋欣賞嘅係海鮮濕炒河粉！份量夠晒多，配料感覺仲多過河粉呀！有鮮魷、蝦同青口，仲有好多素菜添。濕炒嘅醬汁非常濃郁，但又唔會太杰太濃，撈埋啲滑嘟嘟河粉一齊食就最perfect！
芒果冰沙
整體嚟講，餐廳嘅菜式都唔錯，不過，呢個芒果冰沙就麻麻哋喇！因為芒果味非常淡，如果可以重手加多啲芒果就更好喇！
石澳泰 Shek O Thai
地址：石澳石澳村303號地下
電話：+852 2809 4426
營業時間：星期一至五 11:30 – 22:00；星期六至日 11:30 – 22:30
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
