煲仔沙嗲麵真係咁正？ 慈雲山榮記茶餐室
A姐近期見到有唔少傳媒行家都推介呢間位於慈雲山嘅榮記茶餐室，佢哋主打首創嘅煲仔沙嗲牛肉麵，真係隔住螢光幕都聞到濃香嘅沙嗲味呀，所以今個星期日就一於去試試啦！不過，多人介紹係唔係就一定好食呢？
我哋星期日嚟到，加上受多間傳媒推介，所以都預咗鋪頭會大排長龍，但店長就安排唔少熟客打尖，所以我哋都等咗唔少時間。終於到我哋入座喇，喺疫情期間，店員都嚴格遵守探熱呢個指定動作，不過，鋪頭面積唔大，食客坐得好迫，加上搭枱亦無分隔板，確實唔太理想。
煲仔沙嗲牛肉出前一丁
一打開煲蓋，確實有一陣濃香嘅沙嗲味，但啲傳媒報導話肉眼就見到花生粒，就未免太跨張喇，我只係見到滾湯嘅“卜、卜、卜”同牛肉咋！另外，店員提醒要等1至2分鐘，等啲麵浸吓熱湯先熟。終於食得喇！沙嗲味真係好濃，仲好鹹添，加上煲仔確實太熱，所以水份蒸發得好快，令湯越食越少，變成煲仔沙嗲牛肉「撈」出前一丁，而且越食越鹹同越食越杰。唯一欣賞係牛肉真係好嫩滑。
煲仔沙嗲雞扒粉絲
雞扒係另上，呢個位值得加分！一打開煲蓋，濃香嘅沙嗲味確實係吸引嘅，加上一開始食嘅時候，粉絲索晒沙嗲汁，真係唔錯，但同樣地，由於煲仔太熱，所以水份蒸發得好快，令湯越食越少，就變成越食越鹹同越食越杰，真係要飲水解喝。
最後，價錢仲要好貴，其實煲仔麵只係一個gimmick，我都係適合叫番一碗普通碗上嘅沙嗲牛肉麵啦！
榮記茶餐室 Wing Kee Restaurant
地址：慈雲山毓華里12號地下A-B舖
電話：+852 2328 9232
營業時間：星期一至六 06:30 – 21:30；星期日及公眾假期 06:30 – 17:30
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
