睇波嘆火鍋最興奮 長沙灣御尚軒

四年一度嘅世界盃終於開幕喇，無論你支持邊一隊，或者想睇邊個靚仔球星，最正就梗係食住雞煲打邊爐，成班朋友烚吓烚吓，邊食邊講波經邊睇波啦！今次我哋嚟到長沙灣嘅御尚軒，餐廳一大賣點係，清遠雞每日新鮮入貨，夠晒有保證。但話時話，咩叫越位先？

栗子雞煲（半隻）
平時食雞煲多數都係食麻辣雞煲，但因為成日捱夜睇波，怕熱氣嘅我哋就嗌咗栗子雞煲。雞煲用咗好多配料去調味，包括蒜頭、姜片、冬菇、洋蔥、栗子等等。栗子益氣補腎，綿密甘甜；雞件入晒味，肉質鮮嫩，味道豐富濃郁，充滿層次。所以如果怕食辣嘅，都推介你叫栗子雞煲。

手切新鮮肥牛（中）
牛肉新鮮紅潤，而且厚身，十分抵食。只要輕輕淥一淥，保持鮮嫩嘅肉質，已經非常好味。

特級肥鵝腸
呢間舖頭出名材料新鮮，果然名不虛傳。每一款火鍋配料都好新鮮，鵝腸亦都唔例外。鵝腸肥美新鮮，爽口彈牙，真係食唔停口。

白鱔片
白鱔片亦相當新鮮，每一塊都切得大片肉厚，入口又不失彈性。上枱嘅時候塊塊都晶凝通透，見到都流晒口水。

野生竹笙
食雞煲或者打邊爐一定會叫竹笙，放係甘甜嘅栗子煲當中，並且圓滿地索曬肉汁嘅精華，加上爽滑嘅口感，真係錦上添花。

雜菇拼盤
雜菇拼盤分別有三款菇菌，包括雞髀菇、本菇以及冬菇，份量非常多，真係好抵食呀！

御尚軒
地址：長沙灣順寧道15號順景閣地下4-6號舖
電話：+852 2360 2636
營業時間：星期一至日 12:00 – 00:00

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com