石籬在地人米線推介 雲南小鍋米線

香港話大唔大，話細其實都唔細，唔知有無啲咩地方，你係從來都未去過呢？原來當你去到一個陌生嘅地方，真係好有旅行feel㗎！今日得到在地人米線推介，嚟到石籬附近嘅雲南小鍋米線。喺試呢個米線之前，我同M佬聽到「石籬」呢個地方都呆咗，因為我哋完全唔知石籬喺邊同點去㗎！結果我哋大鄉里出城，由葵興港鐵站跟住google map帶路出發，沿路經過工業邨，嚟到和宜合道一帶嘅小商店同小商場對我哋嚟講真係夠晒新鮮，但最深刻嘅就係當我哋攞住個google map四圍望，反而吸引到一對母子嘅注意，佢哋問我哋係未盪失路，可以幫我哋指示方向，呢種人情味竟然喺石籬搵得番。好喇，講番今日嘅主角：雲南小鍋米線。

M佬之選：過橋米線（小辣、走酸菜）
湯底以大量豬骨同雞腳熬製，廚師先將高湯放入小鍋中，再加入炸醬、肉碎、酸菜、韮菜、辣醬等，即叫即煮，所以湯底夠晒熱，而且香味濃郁。食之前當然要試吓佢個湯，湯底好有層次，好吸引呀！呢個過橋米線配菜有蟹柳、腐竹、火腿同紅腸，呢啲配料一嚟到，要盡快浸湯，因為配菜本身唔夠熱，主要係靠熱湯整熱。

A姐之選：雞中翼、腩肉、豬紅雲南小鍋米線（中辣、走芽菜）
如果你第一次去到一間米線鋪頭，通常都會試就腩肉，腩肉預先經花椒八角浸，所以夠晒入味。但我哋就因為初嚟報到，唔知呢度最出名嘅係切到雪花咁嘅雞絲，大家下次去到一定要試試呀！至於雞翼同豬紅就不過不失，始終雲南小鍋米線嘅主打就係佢嘅湯底。至於佢嘅辣度比一般嘅辣，但嗜辣嘅我覺得中辣都未算好辣，下次要嚟試試大辣先得。

雲南小鍋米線 Yunnan Noodle
地址：葵涌梨木道112號葵寶大廈地下5號舖
營業時間：星期一至日 11:00 – 20:00
電話：+852 2424 2510

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com