秋日私房 觀塘御膳
男人都係鍾意食住家飯，不過近排公事繁忙，我真係無時間下廚，只可以搵間私房菜同M佬去嘆吓！觀塘嘅樓上餐廳好多，但都要識路，如果唔係有同事介紹，我都唔知原來觀塘都有私房菜，所以我就同M佬提前預約，嚟到御膳，試吓呢個花膠扒羊肚菌餐。
麻辣手撕雞
份量好多，嫩滑嘅手撕雞配上爽脆青瓜絲，口感一流。加上麻香十足，又夠晒辣，非常開胃醒神！如果唔食得太辣嘅，都可以預訂時同餐廳要求少辣架！
大蜆什菌豆腐湯
嘩！好甜呀！湯底入面有大大隻嘅大蜆，加上好多什菌同豆腐，所以湯色呈奶白色，味道濃郁。
金銀蒜蒸龍躉腩
龍躉腩炸到外面脆卜卜，而魚肉嫩滑，上面鋪上金銀蒜同薑葱，味道好有層次，好惹味。
薑葱炒大肉蟹
餐廳提供多款肉蟹烹調方法，M佬就話薑葱炒係最好味！大大隻肉蟹，份量完勝，超多肉，肉質鮮美，比較爽滑。加上用咗大量薑葱炒，所以非常入味！
蒜蓉粉絲蒸蟶子皇
蟶子大大隻，肉質鮮甜彈牙，但每次食蟶子，重點不在於蟶子，識食當然係食粉絲啦！粉絲索晒精華，加上炒過嘅蒜蓉，真係非常香口惹味。
士多啤梨骨
士多啤梨醬由店家親自製作，所以真係有粒粒士多啤梨架！士多啤梨醬嘅味道酸酸甜甜，非常滋味，加上酸甜味可以中和返肉骨嘅油膩感。
花膠扒羊肚菌
羊肚菌據說非常有益，可以幫助消化、補腎壯陽同補腦提神等功效，但通常有益嘅食物，味道都係麻麻。不過，呢個定律並不適用於御膳嘅羊肚菌，呢個羊肚菌勁索味，口感有啲似竹笙。至於重點當然係花膠扒啦，花膠夠厚身，入晒蠔皇味。
蟹油銀芽炒麵
炒麵炒得乾身有鑊氣，因為用蟹油炒，所以幾有光澤。
雲呢拿布甸
每日嘅甜品都各有不同，今日就係雲呢拿布甸。奶味香濃又夠滑，為呢餐私房菜畫上完美句號。
御膳 Imperial
地址：觀塘敬業街65-67號敬運工業大廈12樓F室
電話：+852 3575 9567
營業時間：星期二至日 18:00 – 00:00
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
