第一次日出康城 將軍澳京滬佳餚

一直以嚟將軍澳日出康城，除咗樓盤就係樓盤，我哋亦無朋友仔住喺嗰頭，所以一直以嚟都無去日出康城嘅衝動，直到佢嘅商場落成開幕，終於吸引到A姐嘅垂青。今日我哋就去到The LOHAS行新商場，至於晚餐就選擇咗主打京滬菜嘅京滬佳餚。

京滬酥香烤鴨
北京菜又點少得片皮鴨呢？呢度嘅片皮鴨係必食推介！份量超多，仲有埋隻鴨髀仔，價錢唔貴又好好味。鴨皮燒得均勻又香脆，脂肪部份唔多，食起上嚟唔會油淋淋；至於鴨肉嫩滑，肉味非常香濃。食片皮鴨嘅配料有六款：糖、甜醬、京蔥、青瓜、蘿蔔同蒜蓉，配搭起上嚟好有層次。最後，餅皮薄得嚟又唔易爛，實在好考大廚功夫。

招牌小籠包
上海菜又點少得小籠包呢？呢度嘅小籠包係必食推介！皮薄餡多，仲要充滿濃郁嘅肉汁，好滿足。

京滬香蔥煎餅
香蔥煎餅嘅皮好香脆，但重點係爆多蔥，而且蔥香十足，啖啖都係濃香嘅蔥油味，鍾意食蔥嘅你真係必點。

外婆紅燒肉
講到上海菜，又點少得紅燒肉呢？一層肥一層瘦，成舊擺晒落口就最滿足。欣賞佢唔會太油膩，脂肪部份成啫喱狀，唔會太有罪惡感。

干煸四季豆
四季豆炒得好有鑊氣，肉碎份量多，鹹香十足，加埋個白飯就最match啦。

京滬擔擔麵
呢度嘅擔擔麵唔係川菜，所以唔會有麻辣嘅感覺，反而能夠細味濃郁嘅麻醬香味， 麵條係自家製作，夠晒幼細，湯入面仲有豬肉碎同蔥花。

嫩雞煨麵
湯底充滿濃郁雞湯味，雞肉嫩滑，加埋雞湯一齊食，味道香濃，唔錯。

京滬佳餚 King’s Delicacy
地址：將軍澳康城路1號The LOHAS 3樓333號舖
營業時間：星期一至日 11:00 – 22:00

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com