荃灣如心海景酒店 天空酒廊情人節下午茶

A姐帶我嚟到荃灣如心海景酒店玩至High Staycation（詳情：情人節浪漫住體驗 荃灣如心海景酒店），咁我都識做嘅，就帶佢去嘆個High tea，等佢打吓卡放吓閃啦！荃灣如心海景酒店41樓嘅天空酒廊喺二月份推出情人節下午茶套餐 Blooming Love in the Air，可以一邊俯瞰青衣同遠至汀九橋嘅景色，一邊品嚐三層嘅美點。喺呢兩座充滿傳奇愛情故事嘅大廈入面度過情人節，就更加有意義啦！

呢個期間限定嘅情人節下午茶套餐分為三層，分別為鹹點、甜點同自家製鬆餅，仲包兩杯咖啡或茶。

頂層：鹹點
頂層嘅鹹點通常都係男士至愛，分別有紅菜頭醃三文魚及三文魚子配牛油蛋包、蟹棒卷配牛油果醬及青瓜、鵝肝批及波特酒配甘筍脆、迷你牛肉漢堡配燒烤汁。我同A姐都特別鍾意紅菜頭醃三文魚及三文魚子配牛油蛋包，一件放晒落口，就可以感受到三文魚嘅肥美、三文魚子嘅鮮甜、加上牛油蛋包嘅香脆，口感一流，好幸福呀！另外，鵝肝批及波特酒配甘筍脆都相當有驚喜，鵝肝夠香濃又細滑，一啲都唔膩。至於迷你牛肉漢堡配燒烤汁，雖然細細件，但牛肉漢堡唔會煎得過老，都有唔少肉汁。

中層：甜點
至於中層就係大部份女仔鍾意嘅甜品，分別有開心果泡芙配椰子醬、檸檬撻配金桔、白朱古力慕斯熱情果醬、心型士多啤梨慕斯。同頂層嘅鹹點相比，呢層就花咗唔少大廚嘅功夫，先唔講味道，淨係賣相都好靚喇！呢個白朱古力慕斯熱情果醬做到成個手袋咁，A姐表示好鍾意喇，而我就覺得一向俾人感覺好甜嘅白朱古力配上酸嘅熱情果醬，成件事又出奇地夾喎！另外，檸檬撻配金桔放上成隻金桔，賣相一流！整體嚟講，欣賞大廚嘅細心配搭，將甜同酸嘅食物組合一齊，唔會太甜太溜。

底層：自家製鬆餅
最後嘅底層就有原味及伯爵茶提子鬆餅配奶油忌廉、士多啤梨及杏脯醬，鬆餅好香口又好香牛油味，特別鍾意伯爵茶鬆餅，帶有濃香嘅伯爵茶味道，相當唔錯。

除咗下午茶，我哋亦喺如心海景酒店嘅天空酒廊試咗佢哋嘅鐵板午餐（詳情：荃灣如心海景酒店 天空酒廊嘆鐵板餐）。

天空酒廊 Sky Lounge
地址：荃灣楊屋道8號如心海景酒店暨會議中心41樓
電話：+852 2280 2898
營業時間：星期一至日 12:00 – 18:00

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com