蒸出好滋味 沙田夜茶蒸廬

近排天氣凍咗好多，A姐特意帶埋M佬去探吓住喺石門嘅A婆。A婆第一次見到M佬開心到不得了，猛叫我哋生個曾孫俾佢玩（有無搞錯，我都未嫁得出，淨係諗抱孫），佢老人家諗吓都開心到不得了，仲話要煮餐好嘅俾我哋食，但天氣咁凍，真係唔忍心A婆要洗菜洗米又要整，而且M佬咁大食，食到A婆米缸無米都似，加上A婆鍾意食一盅兩件，所以就去石門京瑞廣場嘅蒸廬啦。

栗子蟲草花花膠燉雞湯

呢個燉湯有花膠、蟲草花、雞、栗子、桂圓等，用料十足，燉湯完全無添加味精，味道清澈帶甜，所以飲完都唔會口乾，夠晒營養，冬天最啱就係滋陰養肺，真係好有住家嘅味道。

蝦子榨菜肉餅飯、香辣銀魚排骨飯

用一大塊荷葉蒸起，所以上枱已經有荷葉香氣。兩個蒸飯都配上菜粒，好清新。而其中蝦子榨菜肉餅飯嘅蝦子配上榨菜夠晒惹味爽口，肉餅唔會散，肉味香濃；而香辣銀魚排骨飯嘅亮點係啲銀魚仔鹹香突出，加上甜豉油更加香口惹味。

蒸廬蒸美點

呢個蒸廬蒸美點用大大個蒸籠，入面有9樣嘢食：2件晶瑩蝦餃皇、2件蟹籽燒賣皇、2件鮮蝦豆苗餃、2件叉燒包同馬蹄糕。

叉燒包：麵包軟綿，叉燒足料，記住趁熱食。

蔗糖馬蹄糕：馬蹄糕唔會死甜，而且有唔少馬蹄，食落香口唔膩。

不過，我哋3個人唔太夠分，所以3大皇牌要另外encore！

晶瑩蝦餃皇

皮薄餡靚，有兩大隻蝦，好彈牙新鮮。

蟹籽燒賣皇

大大粒嘅燒賣，蝦肉彈牙，仲有香菇味，但重點係肥肉瘦肉比例啱啱好，面頭舖滿蟹籽，好吸引。

鮮蝦豆苗餃

鮮蝦豆苗餃賣相好靚，豆苗鮮甜，蝦肉彈牙，但略嫌皮較厚。

老抽豆豉蒸排骨

排骨好入味，M佬值頭想叫多個白飯，配埋芋頭做底，索晒排骨同老抽豆豉味，正。

魚肚冬菇雞札

腐竹包住滑雞、魚肚、冬菇同芋頭，但就無我最鍾意嘅火腿，好彩滑雞都大大舊，所以賣相份量都滿足。

臘味蘿蔔糕

用料有冬菇、蝦米、臘腸等，雖然未有大量蘿蔔絲，但一啲都唔死實，兩邊仲煎得非常香脆。

蒸廬 The Steam Hut
地址：沙田石門安群街3號京瑞廣場一期2樓225號舖
營業時間：星期一至五 11:30-21:00；星期六、日 08:30-21:00
電話：+852 2111 0851

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
報料或合作：keepintouch@aandmdiary.com