西環Cafe2 Oyster n Grill 必食炭燒加拿大牛仔骨

嗱！我哋A姐M佬就講到明重色輕友㗎啦! 不過有時都係要見下朋友嘅，多啲人又可以叫多啲嘢食，一於約埋P小姐同J先生去西環Cafe2 Oyster n Grill試下先，順便去埋佢哋屋企House warming！

黑松露牛肝菌雜菌湯

嘩! 嗰湯未放到我哋面前，就已經先味奪人，勁香黑松露味。質地好厚身，睇得出好足料。入口好Creamy，黑松露同牛肝菌味道好Match。加埋蒜蓉多士， 入口香脆，正呀！

軟殼蟹金柚沙律

講真我哋兩個都唔係太好沙律，不過用柚子汁或者麻醬嘅沙律就例外。柚子汁拌匀沙律菜，加埋車厘茄，酸酸甜甜，清新醒胃。軟殼蟹新鮮炸起，入口香脆。值得一提，嗰炸粉好薄！

鵝肝多士配黑車厘子醬

OMG! M佬，你睇下舊鵝肝幾厚身，好肥美呀! 平時嗰衰佬帶我食嘅鵝肝多士都是細細件。舊鵝肝煎得好香，入口即溶，成口都係陣陣甘香。不過就咁食就有啲膩，連埋多士一齊食，中和返嗰油膩感！

酥炸甜粟米

呢個炸到金黃色嘅係由粒粒粟米整成，配埋芥末蛋黃醬一齊吃，又幾夾喎！不過食落真係有啲油膩，唔可以食太多。

芝士煙肉焗蠔

M佬，你食多隻蠔啦，補下啦！焗蠔肉厚，鮮甜肥美，上面鋪滿煙肉碎，入口好香蠔味。

澳洲和牛意大利飯

識食梗係食和牛啦，所以我哋喺餐牌一見到和牛意大利飯就即刻叫。和牛粒稍微煎香，入口即溶，油脂味濃郁。意大利飯軟硬度適中，加埋芝士同少少黑松露，真係不負眾望。

炭燒加拿大牛仔骨

聽店員講，呢到嘅牛仔骨係無得揀幾成熟㗎，因為大廚話七成熟以上先至好味。嘩! 嗰賣相好巴閉喎！條牛骨好似樹幹咁，牛仔骨肉仲有少少粉紅色，啖啖肉，入口軟熟，牛味香濃。

 Cafe2 Oyster n Grill
地址：西環皇后大道西371號地下
營業時間：星期一至日: 11:30-22:30
電話：+852 2295 6668

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
報料或合作：aandmdiaryhk@gmail.com