豐富抵食鐵板燒 佐敦樂Teppanyaki

鐵板餐就食得多，但喺香港食鐵板燒就真係好少。因為香港食鐵板燒一啲都唔平，但今日我哋就搵到一間豐富又抵食嘅鐵板燒，呢間位於佐敦嘅樂Teppanyaki，提供多款入門級別嘅鐵板燒套餐，價錢由$880起，份量仲要一啲都唔少，係平嘆鐵板燒之選。

時令前菜
坐低咗之後，店員就會送上前菜，今日係沙葛，非常爽脆，夠晒開胃。

18層海膽杯
呢個海膽杯好似芭菲，但就係由18層日式刺身同小食組成，包括：燒白飯魚脆片、黑魚籽、北海道紫海膽、沖繩海葡萄、帆立貝、明太子沙律、牡丹蝦、北海道紫海膽、櫻花魷魚、凍磯煮鮑魚、北歐花膠、藍鯨吞拿魚拖羅容、北海道粒貝、三文魚籽、北海道紫海膽、北海道松葉蟹肉、北海道鮮海膽同鮮海帶碎組成，真係每一層都充滿驚喜！加上層層都唔同，食嘅時候，唔同嘅味道混和一齊，所以每啖嘅味道都大不同，完全衝擊味蕾。

火焰海膽甲羅燒
蟹蓋釀咗海膽、海葡萄、黑魚子、三文魚籽、蟹膏同洋蔥等等，燒完嘅甲羅燒香氣十足！蟹膏同海膽非常軟綿鮮甜，而三文魚籽就脆卜卜，充滿口感。

海膽醬芝士焗原隻龍蝦
龍蝦非常新鮮，喺燒之前，龍蝦仍然非常生猛。龍蝦燒到半熟，就加上芝士，燒好之後，芝士可以拉成絲，而芝士令龍蝦味道更濃郁。

焦糖西京醬煎銀鱈魚
呢塊銀鱈魚又厚又大塊呀！燒香嘅銀鱈魚，油香十足，又鮮又嫰，加上焦糖西京燒醬汁，同銀鱈魚真係最佳搭配，非常驚喜。

北海道煎北寄貝
北寄貝上面放上大量櫻花蝦同煙肉，北寄貝入口嫩滑彈牙，食嘅時候連埋微微焦香嘅櫻花蝦一齊食，非常有層次。

燒野菜
今日嘅野菜有燒矮瓜同紫薯粒，燒到非常香甜，賣相吸引。

時令特色炒飯
炒飯加入大量自家打成嘅蝦粉，炒到乾身而且粒粒分明。上枱前仲會加上蛋白雲朵同蛋黃太陽，影相打卡一流，但就略嫌整體味道較淡。

特色紙包花膠蜆湯
已經食到勁飽，餐廳就送上先紙包包，裡面有花膠、大蜆、秋葵、冬菇等等，夠晒熱辣辣，非常鮮甜。

自家製海膽雪糕
未食之前，我哋覺得好似玩緊《考有Feel》，因為從來無諗過海膽可以成為雪糕。呢個雪糕完全唔腥，雪糕仲好滑溜添，不過，我哋對於海膽雪糕，確實有啲保留喇。

樂Teppanyaki Raku Teppanyaki
地址：佐敦偉晴街29-37號騏邦大廈地下6號舖
電話：+852 2885 8955
營業時間：星期一至四 12:00 – 14:30、18:00 – 00:00；星期五至日、公眾假期及公眾假期前夕 12:00 – 15:00、17:30 – 00:00

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com