超多款式放題打邊爐 任食海鮮將軍澳初心

今日同M佬入去將軍澳探朋友同佢哋個BB，佢哋知我哋鍾意打邊爐，所以今晚晚餐就去佢哋大力推介位於將軍澳The Parkside新開嘅初心啦！佢嘅賣點係好多款式，海鮮除咗蟹之外，都係無限encore，夠晒新鮮，任飲任食，估唔到價錢都係街坊價。問番自己嘅初心，最重要就梗係好食先推介！但想食嘅記住提早book枱，因為口碑好，好多人排隊呀！

餐前小食
小食有木耳、炸魚腩、蝦多士同豆角，份量唔多，炸魚腩外脆內嫩，作為餐前小食好開胃。

尚盛剌身
食完餐前小食，店員就送上刺身船。雖然剌身唔係任食，但更豐富嘅海鮮後面等緊你呀！講番剌身，有三文魚腩、帆立貝、赤海蝦、八爪魚，估唔到連海膽都有！我哋就最鍾意三文魚腩，油脂豐富。不過留意番，每日嘅剌身供應可能會略有不同。

麻辣雞煲
雞肉入味，夠晒嫩滑，好香麻辣味。食雞煲當然唔可以錯過啲配菜，紫洋蔥好香，而且索晒啲雞汁，好惹味。

至hit火鍋
食完雞煲就到打邊爐喇，識我嘅都知，我最憎就係直接加雞湯落雞煲再打邊爐，但呢度當然唔係啦！佢會另上湯底，而湯底選擇足足有7款，分別係：蟲草花南瓜鍋、澳門豬骨鍋、蕃茄美人鍋、香茜皮蛋鍋、四川麻辣鍋、香濃沙嗲鍋等，我哋就叫咗花膠北菇菜膽雞湯，一打開個鍋蓋，陣陣嘅濃郁雞湯味真係非常吸引！湯入面仲有好多花膠，夠晒膠口，打邊爐前當然要飲番兩碗，食埋花膠，補充一吓骨膠原。

環球海鮮船
呢架海鮮船真係相當吸引，仲非常新鮮，有蜆、鮑魚、青口、膏蟹、龍躉片、海蝦。除咗膏蟹之外，全部都係任食，真係食多2 round已經夠回本！龍躉魚片厚切，食落無骨啖啖肉，厚實嘅口感，好彈牙；膏蟹爆多膏，真係好滿足；至於鮑魚同海蝦勁新鮮好彈牙；蜆雖然唔係大大隻，但勝在超甜！

極上肥牛
肥牛牛味香濃，唔算太肥，相對健康。

黑豚肉
豚肉油脂分佈平均，肥瘦適中，好有口感，豚肉味香濃。

野花盛放
除咗以上海鮮同肉類，仲有名為野花盛放嘅蔬菜籃，仲有多款火鍋配料都係任食，最驚你唔夠飽。

飲品
呢度仲有多款非酒精飲品同蕎麥茶，都係任飲㗎！

驚喜甜品
至於甜品方面，仲以為係紅豆沙同西米露啲中式嘢，估唔到係芝士蛋糕，夠晒滿足。

初心 First Heart
地址：將軍澳唐俊街18號The Parkside地下G09號舖
營業時間：星期一至日 07:30 – 15:30、17:30 – 23:45
電話：+852 2117 1884

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com