超級無敵放題夜 荃灣緣聚鮮鍋

我哋好鍾意打邊爐，有「火鍋之塔」之稱嘅荃灣大鴻輝真係細細個就聽過啦！但每次嚟到呢座「火鍋之塔」都要做好心理準備，因為嚟呢度嘅第一件事就係要有耐性排隊搭lift。好彩今次M佬夠醒目，book咗位於3樓嘅緣聚鮮鍋，唔使排隊，直接坐扶手電梯就到啦！至於緣聚鮮鍋嘅食物選擇超多，連飲品都超過30個選擇，真係超級無敵放題夜呀！

食物選擇
坐低嘅第一件事就梗係揀湯底啦！呢度嘅湯底有八款選擇，我哋就揀咗日式壽喜燒。至於食物就分為落單同自取兩部份。

落單食物
嘟QR Code就可以好方便咁喺電話落單，除咗火鍋配料仲有即叫即炸嘅天婦羅。天婦羅有炸蝦、南瓜同茄子，不過今日我哋就無試天婦羅。至於火鍋配料就有肥牛、M5和牛、牛舌、牛肩胛、豚肉、雞件、丸類、餃類同鴨血等，而海鮮就有蠔肉、海蝦、帶子同沙白等，選擇超過50款。我哋叫咗幾round，值得一讚係完全無漏單，上菜速度夠快。特別鍾意牛舌，切得夠薄，肉味又濃；至於海蝦新鮮又彈牙，絕對係必叫之選。

自取食物
餐廳有一半位置都係自取區，食物種類超多，真係要帶多2個胃嚟先得呀！自取區分為唔同區域，其中刺身就有三文魚、希靈魚、劍魚、吞拿魚、帶子同螺片；壽司就有炙燒三文魚、鰻魚、玉子、蟹柳等。至於前菜就有泡菜、麻辣木耳、中華沙律，辣味螺肉、芝味八爪魚、醃蘿蔔、泰式鳳爪等；熟食就有麥樂雞、炸薯角等多款炸物。

至於火鍋嘅蔬菜類，都係位於自取區，有山根、炸魚皮、響鈴、油麥菜、生菜、皇帝菜、粟米、冬菇、蓮藕、金菇等等，特別一讚佢嘅蔬菜，真係好新鮮，又夠碧綠。

甜品
甜品嘅選擇好多，除咗自家製嘅糖水、啫喱、奶凍同布甸之外，當然唔少得雪糕啦！

飲品
真係第一次見到咁多飲品選擇！飲品有大量紙包菊花茶、提子汁、芒果汁、石榴汁，罐裝有可樂、芬達、七喜、忌廉、仲有沙冰、菊花蜜、清酒、梅酒、茶等，估計超過50款。但最估唔到連最新出品嘅有汽檸檬茶都有，可見餐廳非常有誠意。

緣聚鮮鍋 Grand Together
地址：荃灣眾安街55號大鴻輝中心3樓
電話：+852 2515 2988
營業時間：星期一至日 07:00 – 16:00、17:00 – 23:30

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com