遠近馳名燒鵝 尖沙咀裕鵝莊
北京出名片皮鴨、美國出名唐老鴨，香港嘅鴨雖然唔太出名，但我哋都有脆皮燒鵝！想食燒鵝唔洗山長水遠入深井嘅，因為深井裕記燒鵝嘅傳人將祖傳秘方帶到嚟尖沙咀裕鵝莊，仲將餐廳嘅裝修同menu年輕化，勁方便就食到深井燒鵝嘅原味道啦！
蜜汁叉燒拼深井燒鵝
呢度嘅燒鵝以更高溫嘅火爐烤製，將鵝嘅多餘油份逼出，令燒鵝皮更香脆，但食嘅時候又唔會充滿罪惡感。燒鵝充滿濃郁嘅鵝香味，肉質軟腍，非常好味！至於叉燒肥瘦適中，肉質鬆軟，外面燒到焦香，帶有香甜嘅蜜糖味，非常滋味。
杏汁菜膽燉豬肺
香濃但又唔會太搶嘅杏汁，飲落好滋潤！配料有菜乾，而豬肺洗得非常乾淨，完全無腥味。
椒鹽鮮魷釀蝦膠
椒鹽鮮魷就食得多，但嚟個椒鹽鮮魷釀蝦膠就先將蝦膠釀埋入魷魚，再塗上薄薄嘅炸粉，即叫即炸。上枱嘅時候見到粒粒都係金黃色，賣相好靚。至於彈牙嘅蝦膠配上煙靭嘅魷魚，口感好有層次。但令到魷魚更香口嘅，全靠面頭嘅調味料！大廚特意將蒜頭、蔥 、辣椒切碎，再加入五香粉同椒鹽一齊爆香，非常惹味！
豉油皇灼鵝腸
份量非常多，條條鵝腸都上晒色。鵝腸爽脆彈牙，洗得非常乾淨，連肥膏都清埋，食嘅時候唔會油淋淋。墊底嘅有大量芽菜同韭黃，千祈唔好錯過，非常入味㗎！
椒鹽茄子
軟腍腍嘅茄子，外面係炸過嘅椒鹽脆皮，外脆內亂，鹹香十足，形成獨特嘅口感。
鵝油福建炒飯
主打燒鵝嘅餐廳，連鵝油都唔會放過！呢個福建炒飯除咗有香菇、菜心粒、鵝肉粒同原隻蝦球，更以鵝油一齊炒香，令味道更濃郁。
裕鵝莊 Goose Manor
地址：尖沙咀亞士厘道37號九龍中心地下C號舖
電話：+852 2387 1133
營業時間：星期一至日 11:00 – 23:00
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
