銅鑼灣聚盈樓$90即享超過30款點心放題

Family Day嘅節目又點少得一家大細去飲茶呢！我哋就推介位於銅鑼灣智選假日酒店嘅聚盈樓，聚盈樓近期推出午市點心放題，每位只要$90就可以任食點心90分鐘喇！重點係唔洗等位，點心選擇又超過30款，究竟抵唔抵食，味道又點呢？即刻睇吓本文內容推介啦！

預約程序
1. 經KKday購買優惠券（KKday價格為$90，而餐廳walk-in價為$138，所以經KKday會略為平少少）
2. 需最少1日前致電餐廳預約（電話：3590 8826）

提提你
1. 午市點心放題適用於星期一至日 10:00-16:00，限時 90 分鐘
2. 每張優惠券於現場須以現金支付加一服務費及茶芥$38
3. 以上優惠之價格為大小同價
4. ！！！必須列印紙張優惠券！！！

非任食點心
聚盈樓嘅點心分為任食同非任食兩種，其中非任食點心就有五款，分別係：聚盈蝦餃皇、原隻燒賣皇、鮑魚燒賣皇、鳳凰煎米雞同南翔小籠包。其中，聚盈蝦餃皇同原隻燒賣皇嘅蝦肉大大粒又夠彈牙；鮑魚燒賣皇嘅鮑魚雖然細細粒，但勝在鮑魚汁香濃取勝；鳳凰煎米雞將糯米雞煎到香口，飯粒軟熟；至於南翔小籠包就爆晒汁。所以整體嚟講，呢5款點心都夠晒熱辣辣，味道真心唔錯，可惜無得任食，每人每款只有一粒。

任食點心 – 蒸點類
聚盈樓嘅蒸點點心整體都唔錯，選擇有荷香珍珠雞、山竹牛肉球、豉汁蒸排骨、蠔皇鮮竹卷、醬皇金錢肚、香滑奶皇包、蜜汁叉燒包、懷舊燒腩卷同薑汁雞包仔。每款點心都係即叫即蒸，夠晒熱辣辣，特別鍾意醬皇金錢肚，牛肚軟腍又入味；另外，山竹牛肉球夠大粒彈牙。

任食點心 – 煎炸類
聚盈樓嘅蒸點心就唔錯，不過，呢度嘅煎炸類就麻麻哋，全部都唔夠熱，蜜餞雞中翼除咗皮脆之外，就好似無乜味咁；至於蜆介鯪魚球就細細粒，唔算彈牙；而椒鹽魷魚鬚就凍咗，唔夠香脆。抵讚嘅就有香煎蘿蔔糕，真係即叫即煎，有絲絲蘿蔔同臘味，唔錯。其他嘅煎炸類任食點心仲有蒜蓉蝦春卷、金珠鹹水角、椒鹽脆茄子、香煎虎皮椒、鮑汁靚鳳爪同味菜靚豬肚。

任食點心 – 燒味類
聚盈樓嘅燒味選擇有桶子油雞、潮蓮燒鵝、生浸貴妃雞、蜜味叉燒同灼時蔬。不過，每次嘅質素都好參差，好似有一轉嘅燒鵝肉香皮脆，但有一轉就超肥；又好似有一轉嘅油雞係脾同胸位，但有一轉就係頸位。所以真係好睇彩數，但如果好彩嘅，佢嘅燒味都算唔錯。

任食點心 – 麵飯類
至於麵飯類都有兩款選擇，分別係火鴨絲炆米同楊州炒飯，兩款都普普通通，唔食都唔會可惜。

任食點心 – 甜品類
至於甜品就有椰汁紅豆糕、雷沙芝麻球、奶皇煎堆仔、香脆榴槤酥同養顏紅棗糕，不過，我哋都太飽，所以無食甜品喇！

聚盈樓 Gather Seafood Restaurant
地址：銅鑼灣霎東街33號智選假日酒店2樓
電話：+852 3590 8826

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com