長洲豐富海鮮盛宴 濤濤居火鍋煲仔菜

好多人都鍾意去離島食海鮮，當中長洲貴為香港最受歡迎嘅海島，由碼頭至海旁一帶都有唔少海鮮餐廳嘅選擇。不過，長洲有唔少海鮮餐廳就唔多老實，我哋好耐之前就唔小心幫襯過黑店喇！好彩今日有A姐住喺長洲嘅好姊妹帶路，嚟到濤濤居火鍋煲仔菜，呢度嘅嘢食夠新鮮又有鑊氣，最重要係公道老實。

涼拌魚皮
A姐自從中學畢業之後就無乜機會見呢位好姊妹，所以一於叫番支啤酒回味中學嘅往事，但飲啤酒就梗係要叫返個涼拌小食啦！呢個涼拌魚皮好爽脆，加上濃香嘅麻油調味，真係好惹味！我哋就建議加埋芫荽同蔥一齊食，味道好有層次㗎！

白灼苦螺
東風螺就食得多，苦螺都係第一次食。原來苦螺有清熱解毒嘅功效，用嚟配酒就啱晒。呢啲苦螺非常新鮮，所以唔洗加清酒、辣酒去煮，直接白灼就食到最鮮甜嘅味道。苦螺比東風螺更大粒，食嘅時候更有咬口，但唔好俾個苦字呃咗你，因為佢係勁鮮甜。

鐵板蠔餅
呢個係一定、一定、一定要食！蠔餅用鐵板上，除咗可以保持溫度，亦帶有一陣陣嘅焦香味，而最吸引當然係脆邊嘅效果。蠔餅已經非常夠味，加少少魚露提鮮，就已經足夠。蠔仔嘅份量超多，粒粒飽滿，非常滿足！

蒜蓉粉絲蒸扇貝
扇貝勁大粒，亦洗得非常乾淨，口感彈牙，肉質鮮甜。但每次食蒜蓉粉絲蒸扇貝，身為配角嘅蒜蓉粉絲每次都會搶晒主角嘅風頭，真係好入味啊！

豉椒蟶子炒麵
麵底炸到脆卜卜，上面就係勁有鑊氣嘅豉椒炒蟶子。蟶子大大隻完全無沙，而呢度嘅豉椒汁非常濃郁，將脆卜卜嘅炒麵點上豉椒汁，夠晒惹味。

粉絲什菜煲
至於今日嘅蔬菜選擇，就係粉絲什菜煲。裏面有多種蔬菜，配上上湯烹調，清清地，啱晒用嚟配搭今日整個嘅海鮮大餐。

濤濤居火鍋煲仔菜
地址：長洲北社七里一號前座
電話：+852 6886 7130
營業時間：星期一至日 12:00 – 22:00

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com