隱世高質日式小酒館 銅鑼灣Heya へや

救命呀！我真係好想去旅行呀！如果可以再飛，我一定要同姊妹們會返家鄉日本，可以又食又飲，仲可以掃貨…… 呢個「旅行妄想症」已經維持咗一年幾啦！雖然無得飛去日本，M佬今日帶我去到銅鑼灣商業大廈，尋找隱世日式小酒館酒吧 – 銅鑼灣Heya へや，體驗Sake Tasting Workshop！

Heya へや 喺日文係部屋，房間嘅意思，Heya設計簡約，配合柔和燈光，舒適怡人。外面仲有一個小小嘅户外平台，搵嚟香港本地畫家用咗七個月嘅時間，模仿日本畫家歌川國芳風格，畫咗《水滸傳》當中劫富濟貧嘅蕭讓。呢個中日嘅文化融合就係Heya希望營造一個輕鬆嘅環境，用香港的方式展現日本Sake清酒文化！

Sake Tasting Workshop
Heya主打small label嘅Sake清酒，保證大家搵到比較少有同罕見嘅Sake清酒選擇。除咗清酒，呢度仲有唔少梅酒、燒酒、Whisky、啤酒、各款烈酒、咖啡同小食嘅選擇，總有一樣啱你！星期五仲有自家製芝士蛋糕同老火湯，真係好特別！今日我哋試咗佢哋嘅Sake Tasting Workshop，有專人精選四款清酒同佐酒小食，大家試飲完之後，仲可以揀選自己最鍾意嗰款，成支帶返屋企。

第一杯：風の森 ‘Alpha Type 3’ 無濾過原酒 純米大吟釀
風の森嚟自奈良，本身無濾過，味道立體鮮明，層次豐富。另外，用咗有極小氣泡嘅水 Ultra Fine Buble嚟洗米、洗走米入面多餘嘅礦物質同蛋白質，所以飲落仲有少少Sparkling嘅微碳酸感覺，好Refreshing！酒香自然、有少少果香味，好易入口。

第二杯：上喜元 ‘糟垂’ 大吟釀
上喜元 ‘糟垂’ 大吟釀嘅味道明顯比第一杯濃，入口醇厚，口感紮實，有濃郁嘅果香味。

第三杯：酔鯨 ‘高育54號’ 純米吟釀
酔鯨 ‘高育54號’ 純米吟釀嘅清酒樽上面有鯨魚設計，非常有心思。同之前兩杯比較，層次明顯豐富啲，入口較爽口，有少少嘅辛澀感同柑橘清香。

第四杯：龜治好日 純米吟釀
龜治好日 純米吟釀使用100%低農藥栽培米製造而成嘅純米吟釀，入口有清晰嘅酸味，酒味最濃，爽脆俐落。

小食：明太子雞翼
飲酒就梗係要配啲小食啦！明太子雞翼新辣辣，大大隻，裏面塞滿明太子，好足料！

小食：招牌燒賣
呢個係氣炸過嘅燒賣，外皮香脆，配埋辣椒油，送酒一流。

小食：印度優質腰果
食腰果，飲清酒，又幾夾喎！有原味、鹽焗、辣椒芝士同火辣蒜味四個口味畀你揀！

小食：雞胸軟骨
雞軟骨就食得多，雞胸軟骨口感豐富好多，配合埋調味粉，好惹味！

我哋最後揀咗風の森 ‘Alpha Type 3’ 無濾過原酒 純米大吟釀返屋企，嗰包裝都好日系！

Heya Hong Kong
地址：灣仔駱克道401-403號榮華商業大廈4樓A室
電話：+852 3188 9201
營業時間：星期一至六 14:00 – 00:00

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com