隱世高質日本菜 豪嘆銅鑼灣花宵

成年幾無去過日本，好想返鄉下呀！每次返鄉下，除咗睇景點同shopping，最重要就梗係食嘢啦！雖然依家唔可以用眼睛去旅行，但我哋仲可以嚟一場味覺旅行呀！香港嘅日本餐廳選擇好多，但講到味覺旅行，就梗係要同A姐搵間質素高嘅日本餐廳，所以我哋嚟到位於銅鑼灣嘅花宵，豪嘆一次值得分享嘅日本菜！

燒雞泡魚乾
小食就叫咗一份雞泡魚乾，燒過後嘅雞泡魚乾帶有少少焦香，但又唔會太乾，加上廚師落咗少少調味，所以甜甜哋，好開胃。

花宵特上刺身拼盤
刺身拼盤嘅選材真係唔簡單，樣樣都係高質食材，今日廚師就推介咗6款刺身，款款都夠晒新鮮，分別係北海道魷魚、大拖羅、深海池魚、鯖魚、蝦、薄切同厚切原條池魚。魷魚由北海道每日運送，加上依家係魷魚嘅當造期，所以非常鮮甜，爽口彈牙；拖羅超肥美，入口嘅感覺真係不得了，魚脂感豐富，接近入口即熔；原條池魚被分為薄切同厚切，薄切夠精盈通透，魚肉鮮甜，相反厚切就充滿口感，一啲都唔腥。

花宵特上壽司拼盤
壽司嘅選材同樣唔簡單，樣樣都係高質食材，今日廚師就推介咗烏賊馬份海膽、拖羅、火炙左口魚裙邊、青森帆立貝、醬油漬吞拿魚同刺身級別嘅火炙銀雪魚。烏賊爽口彈牙，同面頭軟綿嘅馬份海膽形成強烈對比，口感一流；拖羅壽司同樣超肥美，魚油豐富；至於火炙左口魚邊壽司，紫菜超脆，而左口魚邊帶有焦香，又軟滑，好好味；火炙銀鱈魚壽司絕對係無得輸，魚油豐盈，口感軟滑，好想encore。

松露粒貝
好大隻嘅粒貝呀！雖然係刺身上枱，但就細心加入咗松露，令味道更鮮甜！

原條燒秋刀魚
秋刀魚係日本秋天最時令嘅海產，雖然依家未到最頂峰嘅時候，但呢條秋刀魚已經好肥美！廚師預先起咗骨，所以食嘅時候啖啖肉，肉質油潤。如果唔怕苦嘅，就連埋魚腸一齊食，因為日本人認為呢個先係秋刀魚嘅風味。

七味燒烏賊
新鮮嘅食材真係唔需要太多調味料，好似呢條原條烏賊，燒過之後，只係加上少少七味粉，就已經非常好味鮮甜，夠晒彈牙！

肝醬鮑魚
原隻嘅磯燒鮑魚夠晒大隻，廚師預先切片，食嘅時候夠晒方便！鮑魚上面特別用上鮑魚肝醬，令鮑魚味道更濃郁更原汁原味。

串燒
我哋叫咗四款串燒，分別係厚切牛舌、免治雞肉、一口牛同燒白鱔。估唔到串燒都充滿驚喜，因為時間控制得啱啱好，唔會過熟過生，特別係一口牛，一啲都唔乾唔韌，仲有勁多牛汁！至於燒白鱔嘅魚肉夠晒香，而且完全無泥味，值得一讚。

北寄貝浜燒
北寄貝先切再燒，咁食嘅時候就會夠晒方便，唔會太韌。北寄貝非常爽口鮮甜，但精華係個湯汁度，食完北寄貝就記住飲埋個湯，感受一吓何謂清甜嘅感覺！

花宵 HANAYOI
地址：銅鑼灣登龍街28號永光中心11樓
電話：+852 3619 1134
營業時間：星期二至日 12:00 – 15:00、18:00 – 00:00

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com