集15間韓日風味 太古城KollaBo

一次過滿足3個願望有幾難吖，等我M佬帶A姐去滿足15個願望啦！A姐出名鍾意食韓國菜，炸雞、韓燒、醬油海鮮、春村雞、韓國奧巴都係佢嘅最愛，所以我哋嚟到位於太古城嘅KollaBo，呢間東京過江龍，集合咗15間韓日地道餐廳嘅人氣料理同配方，滿足各位嘅韓日風味！

韓式生牛肉
呢個生牛肉同平時嘅製作方法好唔同，廚師刻意加入蘋果蓉，加重口感，而蘋果蓉亦會突出牛肉嘅香味。食之前當然要將鵪鶉蛋撈勻，令牛肉更香滑！

醬油蝦
每日空運直送香港，夠晒新鮮啦！蝦已預先剝殼，食嘅時候夠晒方便。而蝦身鮮甜彈牙，醬油香濃又入味；蝦頭勁多膏，一啖啜落去，蝦膏香濃回甘，非常滿足。

上級牛里脊肉
燒烤方面，我哋叫咗兩款肉，均採用由日本農場直送嘅高級日本和牛，其中呢款上級牛里脊肉係我哋極力推介！燒嘅時候，加上少少餐廳自家製嘅紅酒鹽，食嘅時候入口即熔，牛嘅油香喺口中徘徊，真係好好味呀！

上級牛橫膈膜肉
至於牛橫膈膜肉真係第一次食，因為牛橫隔膜肉稀有，所以比較少出口。牛橫膈膜肉嘅油花相對比較少，但牛肉味極濃，非常嫩口卻唔油膩。

海鮮辣炒年糕
去韓國旅行，又點少得街頭小食：辣炒年糕呢？呢個年糕嘅份量唔少，除咗年糕，配糕有魷魚、青口、蜆肉、魚糕等等，但重點都唔係呢啲食材，因為最正正子係個辣醬呀！辣醬濃郁，但唔會話太辣，辣得嚟非常香口，更重要係年糕索晒汁，非常惹味。

豬腳
豬腳滷得入味，聞嘅時候充滿香氣，味道濃郁唔油膩。豬皮Q彈，肉質嫩滑，吃多少都不會膩。

海鮮純豆腐湯
呢個湯A姐喺屋企都會煲（為免跪玻璃，所以我點都會話A姐煲嘅係全宇宙最好味）。但喺Kollabo食嘅海鮮純豆腐湯，完全係不一樣體驗，因為佢除咗份量十足，配粒有蜆肉、蠔、蝦、豆腐之外，佢嘅湯底用咗勁多蝦去熬製，所以飲湯嘅時候，會飲到超濃烈嘅蝦香味，俾我重口味嘅朋友就一定要試吓。

KollaBo
地址：太古太古城道18號太古城十期耀星閣地下G1015號舖
營業時間：星期一至四 11:30 – 15:00、17:30 – 22:00；星期五至日及公眾假期 11:30 – 22:00
電話：+852 2529 8813

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com