雞翼放題自肥企画 中環Wingman
挑戰雞翼放題！大胃王M佬同雞翼控A姐，今日嚟到中環Wingman嚟個雞翼放題PK戰，輸咗嘅就要負責今個星期屋企大掃除啦！一入到嚟Wingman，就會見到好多港式設計，例如仿九龍皇帝墨寶、霓虹燈等等，玩味十足。我哋今日就叫咗10款雞翼放題，連汽水、檸檬茶同啤酒都任飲，夠晒抵食！唔講咁多，即刻挑戰！
雞翼放題限時90分鐘，每次最多叫5款味道，而每款味道最多4隻，食完再叫，唔好浪費。呢度嘅雞翼主要分為濕身同乾身，濕身主要係醬，而乾身主要係粉。雞翼全部即叫即炸，製作需時，但就夠晒新鮮熱辣。
泰式甜辣醬雞翼
呢款泰式甜辣醬都係我同A姐首推嘅味道，每隻雞翼都塗滿泰式甜辣醬，又甜又辣，非常惹味。
紐奧良香粉雞翼
紐奧良雞翼一直都深受唔少人喜愛，其實紐粵良粉即係混入咗匈牙利紅椒粉paprika、大蒜粉、洋蔥粉、黑胡椒、小茴香粉、辣椒粉、奧勒岡同百里香而成，所以香氣強烈，味道非常有層次。
黑芝麻海鮮蜂蜜雞翼
呢款味道深受A姐喜愛，而我就係輸咗一隻黑芝麻海鮮蜂蜜醬俾佢！呢隻雞翼嘅醬汁好似食緊乳豬或片皮鴨咁，味道濃郁！
黑椒檸檬味雞翼
呢隻味一啲都唔膩，因為黑椒又香又濃，加上檸檬汁，非常清新開胃。
蒙古燒烤味雞翼
蒙古燒烤充滿濃濃嘅孜然味，同土匪雞翼非常相似。
水牛城醬雞翼
水牛城雞翼一向都唔係我同A姐嘅所愛，但嚟到點都要試吓！雞翼塗滿水牛城醬，又酸又辣，味道非常濃郁強烈，鍾意食水牛城雞翼嘅人，一定唔可以錯過。
巴馬臣芝士蒜蓉味雞翼
勁多芝士粉同勁多蒜蓉呀！雞翼芝士味香濃，加上蒜蓉，味道鹹香又有層次。
咖啡香味雞翼
雞翼灑滿espresso咖啡粉，充滿濃香咖啡味，仲帶有少少咖啡嘅炭焦味，係男人man仔嘅味道。
田園風味雞翼
田園風味有洋蔥、細香蔥同酸忌廉，呢款雞翼係相對淡口嘅清新香味。
死神醬雞翼
呢款死神醬雞翼一定要留到最尾最尾最尾先食！死神醬雞翼充滿辣椒同秘製辣醬，非常非常辣，夠晒刺激，一隻就K.O.左我！
飲品
我哋呢個餐仲包埋飲品放題，其中指定啤酒都係任飲，確實非常抵，啱晒成班friend一齊嚟盡情狂歡，而我就要返去做大掃除啦！
Wingman
地址：中環閣麟街37-43號祥興商業大廈6樓
營業時間：星期一至日 12:00 – 22:15
電話：+852 9607 5500
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
