香料濃咖喱 上環印度皇

A姐雖然係港女，但亦係山系女孩；A姐雖然鍾意食日本菜，但亦好鍾意印度咖喱！今日我哋就約咗喺香港定居嘅印度朋友食飯，了解吓大家嘅近況。佢哋推介位於上環嘅印度皇，餐廳除咗環境舒適，就連當地人都讚呢度嘅印度菜夠地道，仲有個小酒吧，可以飲酒暢談。

Samosas 雜菜咖喱角
嚟到印度餐廳食小食又點少得咖喱角呢？雖然咖喱角係小食，但份量絕對唔小。一碟有四隻，每隻都勁飽滿，炸到勁香脆。餡料有雜豆同薯蓉，充滿香濃嘅咖喱味。可以配埋特製嘅薄荷醬同酸梅醬一齊食，但我哋覺得原味已經非常好味。

Aloo Gobi 薯仔椰菜花
蔬菜方面，我哋嘅印度朋友就推介薯仔椰菜花，佢話好有屋企嘅味道。雖然我哋好難感受何為屋企嘅味道，但見佢食到津津有味，就知呢個貌似簡單嘅餸菜一啲都唔簡單。以薯仔、椰菜花同印度香料煮成，味道相對淡口味卻又非常有層次。

Chicken Chilly 辣椒雞柳
餐牌上面標示咗四隻辣椒，印度店長亦再三提醒呢個真係好辣，但我哋嘅食辣程度一向高，所以無問題啦！上枱嘅時候，呢碟辣椒雞柳好紅呀，貌似好辣，食第一舊雞柳嘅時候，感覺有啲似宮保雞丁，真心完全唔覺得辣，就算after taste嘅辣度有所提升，都只係值一個辣椒，但我哋嘅印度朋友話，食呢度菜係要連埋旁邊嘅蕃茄同辣椒一齊食，咁先至係正常食法，結果我明白點解係四隻辣椒喇！

Butter Chicken 牛油雞
牛油雞係印度菜嘅經典名菜，醬汁主要以香料同番茄整成，但印度皇嘅大廚更細心將雞件以炭火燒過，令呢個牛油雞除咗微辣嘅香料味，仲加添咗炭烤香氣，非常有層次。

Garlic Naan 蒜蓉烤包
食印度菜又點少得Naan呢？我哋叫咗A姐最鍾意嘅蒜蓉烤包。烤包上面有好多蒜蓉粒，充滿蒜香，配埋上面嘅咖喱一齊食，非常滋味。

Pulau Rice 印度皇飯
日本出產嘅米叫珍珠米，而印度出產嘅米就係叫Basmati，Basmati偏尖長身，飯味香濃，而餐廳嘅英文名亦取Basmati。呢個印度皇飯除咗用上Basmati，亦加入咗黃薑粉，煮得相對乾身，配上咖喱醬汁就夠晒match！

Kingfisher啤酒、青檸梳打
香港市面相對較難買到印度啤酒，所以我哋就叫咗印度品牌：Kingfisher啤酒。Kingfisher嘅啤酒泡潔白細膩，麥芽香甜，味道濃郁，用嚟配搭濃郁嘅食材就最夾。至於青檸梳打會預先幫你榨咗青檸汁，令梳打充滿青檸香味，夠晒清新解喝，但就略嫌冰塊較少。

印度皇 Basmati (Taste of India)
地址：上環干諾道中137-139號三台商業大廈1樓
營業時間：星期一至日 11:30 – 15:00、17:30 – 23:00
電話：+852 2541 0995

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com