高水準日式小店 鰂魚涌太古坊旭屋水產
上星期六同M佬去太古城探新居入伙嘅朋友，由朝玩到旯，又要搵食喇。雖然太古城嘅選擇好多，但等位嘅人更多，而且價錢貴又唔好味，所以我哋4個人決定行多幾步再去搵食啦！行到去太古坊一帶，因為Office林立，所以真係好多餐廳選擇，而且間間都係誠意小店。由茶餐廳小炒、輕型三文治，到台式餐廳、星馬菜館等。不過，喺大熱天時最啱就係食日本菜，所以經過呢間位於芬尼街新開嘅旭屋水產，二話不說，我哋就入去開餐喇。
餐廳嘅設計簡約，入到去已經見到好多櫻花設計，好有日本feel呀！店員仲好好笑容咁向我哋推介，我哋再望望餐牌，價錢又唔貴喎，唔知質素又點呢？
小食拼盤（炸雞軟骨、蒜粒三文魚、小女子）
三個小食之中，我哋各有所愛！
我A姐極力推介就係蒜粒三文魚，估唔到細細粒嘅三文魚都好肥美，而且粒粒都有好香嘅蒜味，好match呀！
而M佬就最鍾意炸雞軟骨，炸到脆卜卜，好香口呀，味道又唔會太鹹，送酒真係一流！
而朋友就話貌似平平無奇嘅小女子係最驚喜，味道甜甜哋又帶少少鹹，真係夠晒開胃！
日式生蠔
生蠔大家都食得多，但係喺日式餐廳，改為用上柚子醋，清淡得嚟仲可以Keep住蠔嘅鮮味！而且生蠔夠晒肥美，肉質仲好彈牙，好鮮甜呀！
油甘魚腩薄切刺身
食之前，我哋都討論過，點解要薄切呢？唔通師傅想賣弄功㗎？聽師傅講，原來切得愈薄愈能突出彈牙口感！係未㗎？我哋食之前仲諗咁樣細細嘅一塊，會唔會無口感無咩味㗎！估唔到咁樣細細塊，意想不到嘅超濃油甘魚香味，好爽脆彈牙呀！
特上七層刺身
嘩！七層嘅設計，總共有8款刺身，件件都係厚切㗎！記住由最底層嘅赤蝦開始，帆立貝、三文魚腩、劍魚腩、油甘魚腩、赤貝、中拖羅，最後食到馬糞海膽。各類食材都夠晒新鮮（呢個係基本要求）：
赤蝦：好彈牙，入口仲好膠口添。
帆立貝：超大隻，雖然切片上，但都好厚實，好鮮甜。
三文魚腩：超厚切，好肥美呀。
劍魚腩：亦唔係一般貨色，肉質細膩，鮮甜又好豐富魚油呀。
油甘魚腩：厚切而且肉質結實有彈性，好有口感同好香嘅魚鮮味。
赤貝：彈牙，好清甜。
中拖羅：肥美甘香，入口即溶，真係齒頰留香。
北海道馬糞海膽：入口真係好鮮甜呀，一啲苦味都無！
呢個特上七層刺身性價比超高，必食推介！
牛油果辣味吞拿魚腩碎卷
記住要一啖放晒入口，因為真係好滿足㗎！成口都充滿住吞拿魚腩同牛油果嘅鮮甜味道，小小嘅卷物絕對唔係馬虎之作！
腐皮溫泉蛋
賣相普通，但又係要記住要一啖放晒入口（我A姐個嘴仔真係辛苦死），腐皮燒到外脆內軟，入面就係溫泉蛋，好滑溜呀！
油甘魚鮫
好大隻呀！燒完之後，一啲都唔乾，仲保留到魚嘅魚油甘香味，肉質嫩滑，正！
蒲燒鰻魚飯套餐
最後，女士們都飽飽喇，但M佬話無飯落肚係唔得，所以就叫咗個鰻魚飯定食，半條鰻魚大大條，連碗都裝唔落呀！鰻魚汁超開胃，而鰻魚燒得燶燶哋，好香口又無碎骨！定食仲包味噌湯、沙律、天婦羅同自家製南瓜蛋糕，真係好抵食呀！
不過，呢度座位數量唔多，所以想食就要記得提早訂位喇！
旭屋水產 Asahiya Suisan
地址：鰂魚涌芬尼街15號得發大廈地下D舖
營業時間：星期一至四 11:45-15:00、18:00-21:00；星期五至六 11:45-15:00、18:00-22:00
電話：+852 2194 0338
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
報料或合作：aandmdiaryhk@gmail.com
