高質粵菜推介 貼地價花膠扒 銅鑼灣灃味館
有一種味道叫享受！話說A姐嘅屋企人好鍾意食粤菜，作為未來女婿嘅我，腦海即刻浮現銅鑼灣嘅灃味館，呢度主打高質手工粵菜，其中代表菜式之一嘅巨型花膠扒，真係出得廳堂，而價錢夠晒貼地親民。適合嚟緊嘅長輩生日、父親節、母親節等慶祝聚餐，絕對會令長輩們食到舔舔脷，對你安排非常滿意！
金沙大刀脆魚皮
你無睇錯，呢個真係炸魚皮呀！魚皮超大塊，上面佈滿起沙質感嘅金沙鹹蛋，所以食嘅時候除咗夠香脆，仲充滿無限滿足感嘅鹹蛋香味，味道超香濃，真係好罪惡呀，但又忍唔到口係咁食。身為鹹蛋黃控必食！
鮑汁扣原件12頭花膠扒
大家估吓呢隻原件12頭花膠扒幾錢？答案係$368咋，所以眼見每枱食客都一定會order呢個菜。請恕我孤陋寡聞，呢隻花膠有成兩隻手掌咁長，我真係未試過食花膠都可以用刀叉切嚟食，真係抵食過去食据扒呀！加上花膠非常厚身，所以勁膠口，非常有口感。當然精華所在係佢哋秘製嘅鮑汁，夠晒濃郁，花膠入晒味，非常滿一！
魚湯脆米海東星斑
呢道菜係另一個必點推介，記得訂位時要預訂埋呀！因為老闆要預先揀條新鮮，足2斤嘅東星斑，如果嗰段時間東星斑嘅質素未如理想，真係想食都無得食，可見餐廳對食物出品嘅執著呀！喺上枱之前，大廚特意將最後烹調步驟喺你面前處理，首先呈奶白色嘅魚湯，原來係由4款海魚熬製，將滾湯淋上東星斑同脆米之上，即時「咋」咗一聲，真係非常治癒！期待已久，終於有得食喇！東星斑非常嫩滑，魚肉爽口彈牙，食嘅時候完全無骨，啖啖肉。同樣地精華當然係個魚湯啦，湯底超鮮甜而且一啲都唔腥，加上無任何魚骨魚碎，非常滑口！
新鮮菠蘿拔絲咕嚕肉
咕嚕肉真係好多人都好鍾意食，但其實非常考功夫，而呢碟新鮮菠蘿拔絲咕嚕肉絕對係鎮店之寶！呢度嘅咕嚕肉特意選用豬頸肉，炸到外表脆卜卜，而裏面嘅肉質嫩腍，保持住肉汁。旁邊嘅新鮮菠蘿亦不容忽視，大廚突意用火槍輕輕燒過，帶有焦香嘅燒菠蘿，香甜多汁，非常醒胃。至於醬汁以山楂、蜜糖取代麥芽糖，以達到拉絲嘅效果。
籠仔荷香客家梅菜蒸芥蘭
近期多咗人用蒸嘅方法煮菜，因為可以保存菜嘅營養同鮮甜味。呢碟籠仔荷香客家梅菜蒸芥蘭，味道真係好有層次，食嘅時候，首先出現芥蘭嘅味道，然後梅菜嘅鹹香味隨之出現，最後仲帶有淡淡卻唔會搶風頭嘅荷葉香味。
焦糖燉蛋配桃膠鮮果粒
最後，就以呢個甜品作結。杯仔細細，卻非常有驚喜。以為上面有鮮菠蘿同桃膠，而下面配上嫩滑嘅焦糖燉蛋就叫滿足，殊不知原來裏面仲有黑糖，真係有多重嘅味覺享受。
灃味館 Fung Mei Gwun
地址：銅鑼灣駱克道491-499號京都廣場7樓
電話：+852 3705 3892
營業時間：星期一至日 12:00 – 15:00、17:30 – 22:00
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
