黃埔潮食湘菜 與周杰倫約會的香湘辣妹Spicy Girl

自從開咗黃埔站之後，我哋兩口子由以前一年都去唔到一次黃埔，到依家一個月至少嚟一次，貪呢度夠晒方便又多選擇！今次就一於試吓啲特別嘅菜式啦！由細到大，都聽過中國有八大菜系，唔知成日懶醒嘅A姐又唔知係邊八大呢？

A姐：川菜……（10秒後）我所煮嘅菜都係名菜，你個衰佬，你話係唔係呀？

其實除咗川菜（四川菜），中國八大菜系有魯菜（濟南菜）、粵菜（廣東菜）、淮揚菜、閩菜（福建菜）、浙菜（浙江菜）、徽菜（徽州菜），仲有今次我哋去食嘅湘菜（湖南菜）！A姐，你知唔知湘菜出名係辣，咁同川菜嘅辣又有咩分別呢？

A姐：就係好辣同無咁辣嘅分別！

其實湘菜嘅賣點係鹹香同酸辣，而烹調方法主要係煙熏同醃製；而川菜嘅賣點係麻辣，而烹調方法主要係發酵同滷製。既然對湘菜唔太認識，今日一於去試吓香湘辣妹Spicy Girl啦！

由一踏入呢間餐廳，已經聞到陣陣酸辣烤魚味，而電視仲播緊湖南衛視，點菜落單嘅店員都係講普通話，配合埋呢度嘅設計，真係好似番咗大陸咁。除此之外，因為老板娘好鍾意周懂，所以每道菜都配上周杰倫Jay Chou嘅歌名，又真係幾有心思喎。

涼伴木耳（黑色幽默）
記住！記住！記住！（好重要所以要講3次！）要撈暈先好食，我地初頭覺得好淡口，點知去到碟底嘅就好香蒜辣味，正！

金牌蒜香骨（七里香）
外皮炸到脆卜卜，蒜香超惹味，但入面嘅肉就好幼嫩，肉汁仍然juicy！

辣子雞（時光機）
嘩！好多辣椒呀！頭幾啖A姐仲話唔辣，點知越食越辣，越辣就越香，越香就越好味！細細粒嘅雞粒炸得非常香口，而且炸得乾身，唔會話好油膩；除咗雞粒，仲有花生，送酒一流！

土豬肉煨煎豆腐（楓）
用上硬豆腐同豬腩肉一齊煮，望落以為清清地，原來都暗藏辣機，雖然唔算話好辣，但就絕對驚喜！

香湘辣妹
地址：紅磡必嘉街120號黃埔花園第3期地下29號舖
營業時間：星期一至五：10:00-15:00、17:00-22:00；星期六至日：10:00-22:00
電話：+852 3152 3335

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
報料或合作：aandmdiaryhk@gmail.com