主打韓式素食 健康之選尖沙咀The Joomak

我A姐真係幾時都咁鍾意食韓國嘢㗎!不過,韓國嘢好似永遠都離不開韓燒呀、部隊鍋呀……雞肉、豬肉、牛肉,真係全部都係肉呀,最多都係得啲泡菜中和吓!所以我成日都係度諗,唔知韓國多唔多人食齋呢?又如果食齋,韓國嘅素食唔通只係得泡菜同飯?今日我哋就去到尖沙咀呢間韓國餐廳,雖然都有肉食供應(啱晒M佬),但主打素食嘅The Joomak,唔知又會唔會有驚喜呢?

韓式素炸雞

自從識咗來自星星的炸雞,每次食韓國嘢,枱上總會有呢道菜,如果變成素菜,就係將豆卜夾住塊素肉,再炸!食落口,脆卜卜,當然就無平時炸雞嘅Juicy感,但都不失咬口,加上點埋甜辣醬同有爽脆嘅青瓜絲,真係幾可亂真,但就食得健康!如果個甜辣醬醬汁可以調淡啲就更Perfect啦!

韓式素飯卷

除咗炸雞係素食,呢個飯卷係另一個素菜熱門選擇。飯卷中有素雞肉、腌黃瓜、紅蘿卜絲、青瓜絲、杏仁片。味道微辣,口感層次分明,真係健康得嚟又不失飽腹感。

紫菜三文魚拌飯

上枱一刻真係畀成堆紫菜絲嚇親!雙手帶上手套撈撈撈之後,就將紫菜、三文魚鬆、漬蘿蔔碎、白芝麻等撈好。三文魚鬆份量好多,所以成個拌飯都有好濃郁嘅三文魚味呀!加埋麻油嘅香味,呢個拌飯確實唔錯㗎!

紫菜 X 溶岩芝士包

嘩!嘩!嘩!呢個芝士包入面簡直係罪惡嘅天堂,好多好多好多芝士呀!你可以將炸雞、炸年糕、炸魷魚圈、炸翠玉瓜、炸雞脾菇等,放落去呢個芝士浴入面,再拎出嚟就會拉到絲,好玩又好食!而其中最驚喜嘅係以為平平無奇嘅翠玉瓜,因為厚切,所以口感十足!最後,飽到連個芝士包都無食到一半就要投降喇!

顛峰狀態

分️3種濃度:3.0、2.0和1.0。其實我哋都唔知咩係羽衣甘藍,但就好肯定咁揀咗3.0!顛峰狀態其實係用咗羽衣甘藍、菠蘿汁、薄荷葉、韓薑、杞子等一齊打汁。我哋叫嘅係3.0,所以草青味好濃而菠蘿味較輕,但A媽教落,呢啲味道先係健康!

爆谷荔枝 ‧ 韓shake

係呢度M佬都可以係Bar Tender!用上荔枝、梳打水、荔枝汁同酒,最正係酒嘅濃度可以因為自己口味調教,配埋鮮甜嘅荔枝,好開胃呀。

The Joomak
地址:尖沙咀廣東道17號海港城海運大廈3樓LCX 34號舖
營業時間:星期一至日: 12:00-22:30
電話:+852 2111 0851

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
報料或合作:aandmdiaryhk@gmail.com

Leave a Reply

Your email address will not be published. Required fields are marked *