九龍城掃街美食 味龍BBQ美食坊

平時有外國朋友嚟香港玩或者放工想買啲嘢食吓,我都好鍾意督番串燒賣或者魚蛋。其實港式小食真係好味又多選擇,唔知大家又對邊款掃街嘢食情有獨鍾呢?今日我哋路過九龍城嘅味龍BBQ美食坊,本身諗住督串小食,但見到老闆娘整緊串燒,燒得香噴噴,就係咁,我哋就就坐低開餐。

蒸燒賣咖哩魚蛋
作為小食店,又點少得燒賣同魚蛋呢?魚蛋有辣有唔辣,任君選擇。魚蛋無想像中咁辣,但就好入味。而燒賣嘅魚蓉味好香,唔似出面有啲成粒擦膠咁。

煎釀三寶
非官方統計,除咗魚蛋同燒賣,最受大家歡迎嘅仲有煎釀三寶!而煎釀三寶醯當中,又以炸魚蛋最受歡迎,當然仲有紅腸、茄子、西椒同荳腐啦!老闆娘話為咗大家食得健康啲,唔用千年油,所以炸出嚟嘅煎釀三寶,炸到金黃色,好吸引。

炸大腸
呢度嘅炸大腸好正架!首先乾淨係必須嘅,而且老闆娘先將大腸落鑊炸,炸完再放上燒烤爐上烘,令到炸大腸唔會油淋淋,仲會特別脆添!

蒜蓉燒茄子
蒜蓉燒茄子絕對係味龍BBQ美食坊嘅名菜!因為老闆娘嘅特調蒜蓉汁,真係好香,好入味,燒得啱啱好,好好味。

串燒
串燒嘅選擇好多,想食咩就自己夾,而為確保海鮮新鮮,所以想食燒海鮮嘅你,就要直接同老闆娘order喇。我哋分別叫咗燒魷魚、燒粟米、燒雞軟骨、燒羊肉、燒牛舌、燒鴨舌、燒雞翼尖、燒包心丸、燒芝士腸等,叫咗咁多嘢,價錢一啲都唔貴!燒嘅時間啱啱好,加上少少辣同秘製沙嗲醬,食得好滋味!

灼墨魚灼牛柏葉灼豬皮
除咗串燒,仲有灼墨魚、灼牛柏葉、灼豬皮或灼魷魚等,加上咖哩醬,真係好惹味!

生菜魚肉
最後,仲食咗碗生菜魚肉,呢碗生菜魚肉好驚喜,魚肉嘅魚味好香又唔腥,而且重點係生菜同魚肉比例,出面好多時都係7:3,但呢度嘅份量係3:7,大滿足呀!

味龍BBQ美食坊
地址:九龍城衙前圍道21號偉明樓地舖

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
大眾點評:A姐M佬
Trip Advisor:AandMDiary
Youtube:A姐M佬玩樂日記
報料或合作:keepintouch@aandmdiary.com

aandmdiary

香港生活、飲食、旅遊、電影博客 Hong Kong Foodie, Lifestyle, Food, Travel and Movie Blogger & KOL, Hong Kong Blogger 分享香港餐廳美食推介及食評,影評最新電影評論及推薦,香港周末拍拖好去處,自由行行程景點建議安排,旅行攻略懶人包等。

Leave a Reply

Your email address will not be published. Required fields are marked *