放暑假一家大細嘆龍蝦海鮮Buffet 港島太平洋酒店仲夏情迷法越夜

每逢屋企人生日同啲周年紀念,香港人都好鍾意去食buffet慶祝!不過近年我同M佬都少食咗buffet,因為依家啲酒店buffet真係越賣越貴,而且我哋特別多紀念日,例如拍拖紀念日、相識紀念日、第1000日紀念日、第3344秒紀念日、第一次熱吻紀念日……仲有雙方嘅生日、情人節、聖誕節……咁銀包仲得了嘅!不過,今日介紹呢間位於西營盤嘅港島太平洋酒店,喺旗下嘅中西∙環餐廳推出「仲夏情迷法越夜」自助晚餐,醒目嘅M佬見暑假就帶埋契女去食buffet,用網上預訂自助晚餐仲有7折優惠,埋單每位大人都係$326起,但呢個價錢有乜嘢食先?

蒜香珍寶越南大頭蝦配香煎鴨肝伴紅酒梨

今次嘅buffet主打法國菜同越南菜,講起法國菜又點少得鴨肝,而講起越南菜又點少得大頭蝦呢!所以餐廳特別安排每位食客一份,餐廳用上兩頭越南大頭蝦,鋪上牛油同蒜蓉,再焗製,所以味道好香濃,而蝦肉仲好新鮮彈牙㗎。而鴨肝伴上紅酒梨,除咗好有口感,更重要係令油膩感大減,話晒食buffet,戰鬥力係好重要。

法式慢煮油封鴨脾

油封鴨脾亦係法國嘅經典名菜,因為呢道菜嘅功序繁複,製作需時,呢度竟然係任你食呀。呢個油封鴨脾做到外酥內嫩,鴨味濃郁,醬汁好有層次。

越式酸子蟹

酸子原來係越南其中一種特色醬料,酸酸甜甜架,夠晒開胃!而蟹肉鮮甜多肉,同個醬夠晒match。

越式蔗蝦

平時去食越南嘢,蔗蝦係小食拼盤中嘅一員,而係酒店buffet食到嘅就更加認真!除咗蝦肉夠新鮮彈牙,仲食到香茅同九層塔嘅香味,好有層次。

越式牛肉湯粉

呢個Pho嘅牛骨湯底,聽大廚講用大量牛骨煲6個鐘以上,所以湯底嘅牛味香濃。牛肉湯河配有生牛肉同牛腩片,即叫即淋上牛骨湯,咁牛肉先至夠滑,仲可以自行加上洋蔥同紫蘇葉,炮製獨有嘅越南風味。

越式扎肉烤法包

而越南菜又點少得經典嘅法包呢!法包夾上胡椒扎肉、紅洋蔥、生菜、青瓜、蕃茄、喇沙葉及蛋黃醬等材料,口感好豐富!最重要係法包切到細細隻,唔會話食完之後好飽。

而越南菜又點少得脆卜卜嘅春卷同香茅雞翼呢!

除咗以上嘅法國菜同越南菜,當然唔少得酒店buffet嘅主打,魚生啦!呢到嘅魚生種類有成5種,除咗新鮮,仲係厚切,口感一流。

西冷係另一個推介,5成熟啱啱好。仲有燒汁同黑椒汁,同西冷好鬼夾!

但最驚喜,最估唔到嘅係,以呢個價錢竟然有超多膏嘅麵包蟹同大大隻龍蝦!食多幾隻已經回本啦!

當然仲有長腳蟹腳、螺、蜆、青口同蝦,真係好豐富。

仲有唔少冷盤選擇。

最後,食埋甜品就好滿足啦!

中西∙環 Centre Street Kitchen
「仲夏情迷法越夜」自助晚餐

地址:香港干諾道西 152 號港島太平洋酒店1樓
營業時間:7月3日至9月30日 18:15-21:30
網上預訂:www.islandpacifichotel.com.hk
電話:+852 2131 5908

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
報料或合作:keepintouch@aandmdiary.com

aandmdiary

香港生活、飲食、旅遊、電影博客 Hong Kong Foodie, Lifestyle, Food, Travel and Movie Blogger & KOL, Hong Kong Blogger 分享香港餐廳美食推介及食評,影評最新電影評論及推薦,香港周末拍拖好去處,自由行行程景點建議安排,旅行攻略懶人包等。

Leave a Reply

Your email address will not be published. Required fields are marked *