超值早鳥四人套餐 旺角OPPA韓國燒肉店

A姐:我好想去東大門!
M佬:又去買衫,買化妝品?
A姐:唔係呀!
M佬:咁去做咩?
A姐:去食韓國燒烤囉!
M佬:咁唔洗飛去東大門啦!

要食韓國燒烤姐,唔洗特登飛去東大門啦,香港大把啦!今日就去旺角OPPA韓國燒肉店啦!呢到嘅燒板微微傾斜向一邊,可以等多餘嘅油份晌末端嘅坑位流走,好細心。

我哋叫咗$398精選早鳥四人套餐,包括:牛排骨湯或泡菜年糕湯、韓式冰鎮蚌片或醬雞片、牛胸白肉片、醬腌豬肋肉或五花腩、、四式韓牛拼盤(包括封門柳、韓牛頸脊、下腹牛肋肉、雪花腩片)同鐵板芝士墨汁炒飯。

韓國泡菜+泡菜蛋

一開始就梗係食韓國前菜3小碟先啦!另外,呢度嘅爐邊泡菜蛋都幾足料,除咗泡菜,仲有魷魚粒,好有口感。

牛排骨湯 或 泡菜年糕湯

我哋揀咗牛排骨湯,嚟到熱辣辣,出晒煙,未飲就已經聞到好香牛味。嗰湯非常足料,煲到奶白色,牛味香濃,正!

韓式冰鎮蚌片 或 醬雞片

我哋太鍾意食燒肉啦,揀咗醬雞片,雞片好滑,一啲都唔鞋,不過以為醬雞片係醃過,點知係無㗎!

牛胸白肉片 (無貨,所以轉咗牛柳粒)

牛柳粒大大粒,牛味濃郁,好有口感,加埋啲脂肪油香,真係無得彈。

醬腌豬肋肉 或 五花腩

醬腌豬肋肉脂肪分布平均,燒嗰陣「炸炸」聲,好香口。

四式韓牛拼盤(包括封門柳、韓牛頸脊、下腹牛肋肉、雪花腩片)

主角到啦! 呢個四式韓牛拼盤可以一次過試晒 封門柳、韓牛頸脊、下腹牛肋肉同雪花腩片,各有特色。

封門柳,牛味最濃,比較爽口,我最鍾意。

韓牛頸脊,牛味重,肉質鮮嫩。

下腹牛肋肉,有咬口,牛味較淡。

雪花腩片,脂肪分布平均,好香脂肪油香。

鐵板芝士墨汁炒飯

呢個炒飯唔係喺廚房炒完拎出嚟,而係店員即場喺你面前炒。材料都幾豐富,有墨魚汁、墨魚粒、青口、帶子、蝦、茄子、紫洋蔥、辣椒、蒜片同白飯。

店員先將海鮮放晌鐵板上面燒,之後就炒開始香茄子、紫洋蔥、辣椒同蒜片。最後就加埋白飯、墨魚汁同墨魚粒,炒呀炒呀,完成!真係又睇得,又食得,好有鑊氣,不過墨魚汁再濃啲就仲好味!

OPPA韓國燒肉店
地址:旺角洗衣街117號建煌華廈地下
營業時間:星期一至日17:00-02:00
電話:+852 2381 2193

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
報料或合作:aandmdiaryhk@gmail.com

aandmdiary

香港生活、飲食、旅遊、電影博客 Hong Kong Foodie, Lifestyle, Food, Travel and Movie Blogger & KOL, Hong Kong Blogger 分享香港餐廳美食推介及食評,影評最新電影評論及推薦,香港周末拍拖好去處,自由行行程景點建議安排,旅行攻略懶人包等。

Leave a Reply

Your email address will not be published. Required fields are marked *