銅鑼灣奈良上釜Kamameshi 新鮮都係釜飯好

A姐:M佬!前面火燭呀!快啲走呀!
M佬:傻豬!白色煙唔係火燭啦,去睇吓咩事先!

就係咁,我哋就行去睇吓發生咩事!原來喺餐廳--銅鑼灣奈良上釜Kamameshi--門口放咗一個大大個嘅釜飯碗,仲噴緊煙添!我哋去日本都未食過釜飯,既然一場嚟到,就同A姐成個大鄉里咁試吓釜飯啦!

連A姐都唔識嘅釜飯,其實姐係日本版嘅煲仔飯,大家又知唔知係點整架呢?其實就係將米啦、上湯啦、食材啦,全部放入鍋中,再蓋上木蓋燜煮,所以出到嚟啲米飯係完全吸收晒上湯同配料嘅精華!

奈良七盛釜飯
喺釜飯製作過程中,先上前菜、沙律、煮物同三色刺身。

前菜有醃物、醃蘿蔔、麻醬豆腐同蒸蛋;煮物就有冬菇煮南瓜;而三色刺身就有油甘魚、吞拿魚同甜蝦。


其中最驚喜嘅係蒸蛋,除咗夠晒足料,有蝦肉、蟹肉、三文魚子、冬菇同黑松露之外,個蛋係滑過A姐塊面呀!

今晚嘅主角一終於上台,打開七盛釜飯,個種鮮味真係好pure,再數數有邊7樣嘢先:包括有蟹肉、海蝦、鮑魚、三文魚子、冬菇、白木菇同三葉。嘩!睇見都流晒口水!由釜飯?落個碗度,記住加埋三文魚子,我食喇!成碗飯嘅味道好鮮,但重口味嘅朋友或者會嫌淡,但佢嘅賣點正正就係原汁原味,食到尾嘅話,仲有焦香味十足嘅飯焦,鍾意飯焦嘅朋友就至like啦。

蟹盛套餐

喺釜飯製作過程中,先上天婦羅松葉蟹同松葉蟹腳。天婦羅松葉蟹炸到好香脆之餘,仍不失蟹味;而大廚已預先將松葉蟹腳?開部份蟹殼,方便大家進食,啱晒嫌食蟹煩嘅A姐!蟹肉鮮甜多汁,yummy~~

蟹盛都有蒸蛋,而呢個蒸蛋比七盛更加驚喜,有成隻蟹鉗、蟹肉、三文魚子、冬菇等,好鮮甜又好滑,真係唔想同A姐share呀,好好味囉。

今晚嘅主角二終於上台,打開蟹盛釜飯,嘩嘩嘩!成個蟹蓋呀!拎起蟹蓋,下面有大量蟹膏,同超大量蟹肉!成碗飯都充滿住蟹嘅精華,將蟹膏蟹肉同飯徹底地撈暈,呢碗飯真係好好味,粒粒飯都有好濃郁嘅蟹味,正!

最後隨釜飯仲有麵豉湯同水果添。

奈良上釜 Kamameshi
地址:銅鑼灣登龍街39號地舖
電話:+852 3555 4111

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
報料或合作:aandmdiaryhk@gmail.com

aandmdiary

香港生活、飲食、旅遊、電影博客 Hong Kong Foodie, Lifestyle, Food, Travel and Movie Blogger & KOL, Hong Kong Blogger 分享香港餐廳美食推介及食評,影評最新電影評論及推薦,香港周末拍拖好去處,自由行行程景點建議安排,旅行攻略懶人包等。

Leave a Reply

Your email address will not be published. Required fields are marked *