旨呈向經典致敬 港版捉鬼敢死隊
每個男人都係一個收藏家，好似M佬咁，佢就鍾意收藏飛機模型；而今日呢位男人就鍾意收藏電影《捉鬼敢死隊》嘅物品，佢仲鍾意到做埋導演同演員添！講緊呢位咁熱血嘅男人就係《全民造星3》嘅旨呈。旨呈對《捉鬼敢死隊》嘅愛一啲都唔簡單，佢為咗實現夢想，特登聯絡電影公司嘅授權，聯合《全民造星3》嘅幾位成員組成港版《捉鬼敢死隊》，並拍攝短片向經典電影致敬。
《捉鬼敢死隊》
《捉鬼敢死隊》喺1984年同1989年分別推出咗第一集同續集，由於電影入面加入咗唔少特技效果，以當時嘅科技嚟講，確實係令觀眾嘆為觀止。加上劇情創新，令《捉鬼敢死隊》成為第一部賣座破一億美元嘅恐怖喜劇片，絕對係80年代其中一套經典電影。直至2021年11月，全球戲迷期待已久嘅《捉鬼敢死隊》將會推出全新一集：《捉鬼敢死隊：魅來世界》，我同M佬都非常期待呀！
香港版《捉鬼敢死隊》
旨呈對《捉鬼敢死隊》嘅喜愛絕對唔係流於表面，佢特登聯絡電影公司，獲得授權之後，就開始策劃香港版《捉鬼敢死隊》，除咗編同導，更成為其中一個角色，所以呢個項目除咗感受到佢嘅熱誠之外，更明顯係一個自肥計劃啦！呢條短片將會喺11月4日透過Sony推出，短片除咗旨呈之外，仲有全民造星3嘅幾位成員：田中（田見超）、小新（許紹燊）同黎蘊芝（Dilys）。我同M佬就獲邀請悉先欣賞，拍得都幾搞笑架，有興趣嘅朋友之後就一定要留意喇！喺短片播出之前，俾啲劇照大家睇睇先啦！
另外，我哋仲有機會同旨呈傾吓計，了解一吓佢對電影《捉鬼敢死隊》嘅情意結。
A姐：點解會有今次嘅合作呢？
旨呈：因為我細細個就有睇《捉鬼敢死隊》，好鍾意呢個故事，更慢慢收集佢哋嘅紀念品。直至知道全新一集嘅《捉鬼敢死隊》即將推出，所以就同Sony自薦拍攝香港版《捉鬼敢死隊》，而成就今次呢件事。所以非常多謝Sony無限量去支持呢件事，仲實現到自己嘅小小夢想，向《捉鬼敢死隊》致敬。
A姐：今次呢條短片最難忘係嘅係咩呢？
旨呈：今次嘅作品，除咗可以實現自己嘅小小夢想，更難忘嘅當然係有一班演員同幕後同事投入呢件事，令成件事非常熱血。加上大家都非常用心，創意又夠癲，所以就算只係一條短片，大家都以非常高嘅質素去製作，令成件事好玩，觀眾睇得又開心。
A姐：可唔可以介紹一吓你嘅收藏品呢？
旨呈：呢個質子背囊係為咗今次嘅拍攝而特登喺美國空運嚟香港，仲成為我其中一份最鍾意嘅收藏品。呢個質子背囊絕對係《捉鬼敢死隊》嘅代表物品，可以射出laser捉鬼；至於呢個鬼魂陷阱就喺射出laser之後，用嚟吸鬼；呢隻綠色嘅為食鬼其實無咩攻擊性，但就係《捉鬼敢死隊》故事入面第一隻捉嘅鬼；至於綿花糖鬼雖然係破壞者，雖然踩爛紐約市，但有好多觀眾都覺得佢非常可愛；最後呢架捉鬼車就唔洗多講啦，絕對係《捉鬼敢死隊》嘅signature。
香港版《捉鬼敢死隊》 – 想戰鬥即戰鬥
導演：旨呈
演員：旨呈、田中、小新、黎蘊芝
語言：粵語
上映：4.11.2021
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
