[香港Staycation] Tripadvisor香港第一的酒店 全港最奢華的品牌：奕居
長期佔據Tripadvisor香港酒店第一名嘅奕居（The Upper House），一直都喺我哋嘅staycation checklist之中。當我哋住完一晚之後，更加覺得實至名歸，非常relax。奕居以家為概念，用淡木色為主色，設計低調又有時代感，加上床鋪非常舒適，令我哋入住期間覺得非常放鬆，可以好好充電！
預訂網址：www.klook.com
酒店大堂
奕居位處港鐵三線（荃灣線、港島線、南港島線）交匯嘅金鐘站，去邊都好方便，而且唔怕日曬雨淋，5分鐘就由港鐵站嚟到酒店，而且全程都有電梯或扶手電梯，拎住大件行李都唔會狼狽。加上酒店喺正太古廣場上面，買嘢同補給日用品都好方便。雖然地理位置方便，但由一踏入奕居，就由煩囂變得放鬆，所以不得不讚香港著名建築師兼室內設計師傅厚民嘅功力。
奕居嘅lobby雖然唔大，大門兩邊以火焰為裝飾，旁邊仲有唔少嘅小擺設，已經讓人開始有放鬆嘅感覺。另外，check-in嘅職員會行出嚟迎接大家，我哋只需要喺旁邊坐定定，等咗3分鐘左右，check-in手續就完成，再由職員帶我哋上房，沿途仲會解釋酒店嘅設施同注意事項。大家特別要細味呢條扶手電梯，因為設計師刻意透過呢條扶手電梯去分隔繁忙嘅鬧市同舒適嘅酒店，而我哋嘅staycation旅程就由呢條扶手電梯開始。
房間區域
奕居共提供117間客房同套房，而我哋今次就入住位於44樓嘅Studio80豪華房。呢間客房接近800呎，房間非常大，空間感十足。雙人床超大張，真係點碌都得，而重點係床褥軟硬適中，非常舒服；枕頭總共有4個，2個係軟2個係硬。窗簾遮光一流，所以我哋訓得好好，令今次嘅旅程差足電呀！兩邊嘅床頭都有床頭櫃，仲放有一部藍芽喇叭；另外，房間嘅燈同窗簾control都喺晒床頭櫃，臨瞓前就可以方便大家調教。成間房有唔少叉電位置，惟獨床頭竟然無嘅，相信奕居想我哋有一個好好嘅睡眠質素，遠離電話啦！
我哋房間嘅景觀以山景為主，窗外景色都係綠色，真係讓人感到舒服同放鬆。房間仲有書枱同客廳，其中客廳面積好大，L型梳化大張又闊落。而房間嘅電視除咗本地嘅頻道，亦有電影台、新聞台、體育台同外語頻道，選擇非常多；另外，酒店亦設有自家電影系統，電影選擇又多又夠新，我哋呢兩日就煲咗勁多想睇好耐嘅電影喇！如果都唔啱睇，你亦可以連接自己部電話，想煲劇聽歌都可以自己話事啦！另外，書枱大大張，亦有提供常用嘅文具，夠晒貼心呢！
至於酒店嘅mini bar係另一個奕居嘅賣點！奕居嘅mini bar叫Maxi Bar，放有免費嘅汽水、果汁、啤酒、小食、有汽礦泉水、茶包、咖啡機同多士爐，收費嘅香檳同紅白酒。特別一讚係個雪櫃夠晒凍，自己買嘢飲返嚟，都可以好快雪凍。另外，如果喺入住嘅過程中，有任何需要，除咗call酒店總機，亦可以透過apps查詢協助。好似我哋今次就唔記得咗帶叉電線，我哋就透過apps搵到啱用嘅叉電線，而職員亦都好快就送到上房。
浴室區域
平時住酒店，逗留最耐嘅一定係房間區域，但嚟到奕居，估唔到我哋喺浴室嘅時間一啲都唔少。浴室嘅面積同房間面積一樣大，而浴室入面就再細分為馬桶、洗手盤、衣帽間、淋浴間同浴缸。首先一讚係浴室嘅兩支燈座，真係好似去咗做spa咁架，氣氛一流，真係可以好好享受沖涼嘅moment！另外，呢度嘅浴缸絕對係奕居嘅signature，因為喺一個好高嘅景觀之下享受浸浴。不過，我就反而最鍾意佢個淋浴間，因為我哋入住山景房間，就彷彿去咗森林入面沖涼，加上淋浴間無門，有一種無拘無束嘅感覺。至於用品齊全，包括浴袍、拖鞋、體重磅、風筒、夾萬、牙刷、牙膏、漱口水、梳、浴鹽、浴帽、化妝棉等等，而洗頭水、沐浴露、護髮素同潤膚露就用上英國頂級天然植物萃取與精細工藝嘅品牌：Bamford，真係好香好舒服。
娛樂設施
酒店設有健身室，不過喺疫情期間就無開。另外，酒店亦設有一個室外花園：The Lawn。每逢星期六同星期日，喺The Lawn就會提供免費嘅瑜伽課程。大家亦可以喺旁邊買杯咖啡，再入嚟The Lawn輕鬆心情。
另外，位於酒店頂樓仲有一個lounge，設有一個小型圖畫館，加上景觀開陽，打卡一流。
餐飲服務
酒店嘅頂樓設有一間餐廳：Salisterra，我哋入住期間就喺Salisterra享用早餐。
詳情：最期待嘅酒店早餐 金鐘奕居Salisterra
另外，今次嘅staycation package亦包咗$1,111消費額，所以我哋就叫咗room services。本身以為呢個消費額只可以食到兩份主菜，但呢到嘅room services價錢確實唔算太貴，可以食到飽飽！我哋晚餐就叫咗海南雞飯、爐魚、和牛漢堡同雪糕新地。味道都算唔錯，夠晒熱辣辣架！
世界各地／香港景點門票邊度買至平？
–> Klook：www.klook.com <–
–> Trip.com：www.trip.com <–
–> KKday：www.kkday.com <–
奕居 The Upper House
地址：香港金鐘道88號太古廣場奕居
預訂網址：www.klook.com
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
