藝術在身邊 深水埗人_人

好多人覺得藝術嘅嘢識條鐵咩！但藝術唔一定只係存在喺藝術館內嘅雕塑、畫像同陶藝，其實藝術一直都喺我哋身邊。由香港設計中心主辦嘅「#ddhk設計 #香港地」踏入第三年，今年以蛻變為主題，將深水埗區內嘅公共空間同小店打造成城區設計廊，以「深水埗人_人」為今年活動名稱，提供兩條自助漫遊路線，等你重新認識深水埗。

深水埗
大家所認識嘅深水埗，一定離不開鴨寮街。其實深水埗近年由傳統嘅舊區發展成創意產業，加上呢度有唔同嘅種族人士居住，令呢個地方更多元化。

大南街垃圾收集站
今日我就同A姐嚟到界限街嘅大南街垃圾收集站開始漫遊深水埗。垃圾站？ ！因為喺深水埗有唔少嘅舖頭都有貓店長，所以貓就成為咗深水埗一個成員。喺垃圾站嘅外牆就由本土藝術家兼插畫設計師Kristopher Ho聯同一班義工，創作左呢幅「人人和喵dd」，主題除咗係佢哋對貓店長嘅印象，背景亦以棉花呼應深水埗布料行業。另外，喺呢幅畫作上面，亦有隱藏嘅多啦A夢，大家嚟到嘅時候就考吓眼力啦！

南昌街休憩處
深水埗除咗有各種嘅攤檔、地道小食同售賣電子產品聞名之外，其實深水埗亦係一個多元文化嘅社區，除咗基層香港人之外，呢度亦有唔少南亞族裔。所以喺南昌街休憩處就由街坊同設計師合作，設計左「人人鬆dd」，將唔同民族嘅語言寫出嚟，大家除咗可以透過QR code了解字句嘅意思同欣賞各地方嘅地道音樂之外，更加可以同身邊唔同種族嘅朋友透過呢啲標語作為你哋嘅開場白，為街坊同遊客提供一個相聚嘅實體聊天室，令多元嘅社會更加融合。

喺南昌街休憩處除咗有手繪標句之外，亦有Simple People人像，包括曾經喺深水埗開武館嘅葉問、喺深水埗讀小學嘅許冠傑、同曾經喺深水埗居住嘅黃霑同黃家駒等等，表示深水埗係一個臥虎藏龍嘅地方。

阿里皮藝
深水埗可以話係一個尋寶嘅地方，如果你肯花啲時間嘅話，可能都會搵到唔少心頭好。例如呢間皮革店就有唔同嘅皮革手藝，大家除咗可以直接選購店主設計嘅皮袋或皮革銀包，亦可以買啲真皮返去，創作一個屬於自己嘅皮革手工。

泳發士多
呢啲舊式士多真係買少見少，店主刻意保留舊有嘅設計，除咗賣荷蘭水之外，更重要嘅係賣人情味。喺舖頭外面就放有幾張關愛座，等深水埗嘅老街坊行到攰就可以喺度坐低，同店主傾吓計交流吓。

華興飾品
其實親手做嘅珠仔飾品都係一份獨特嘅藝術品！嚟到華興飾品，呢度有唔少串珠仔、布料、鈕扣、絲帶等等，絕對可以親手做一份禮物送俾自己或朋友，咁就夠晒獨一無二啦！

梁添刀廠
刀，除咗係一件武器，其實亦都係一門手藝，喺梁添刀廠就有唔少刀具，當然叫我哋做一把刀絕對係難度極高，但其實買一把刀嘅時候，亦可以細心留意師傅做刀嘅技術，手藝絕對係藝術嘅一部份。

成昌鐵車
除咗刀之外，成昌鐵車嘅師傅亦係香港僅有嘅鐵車行業。四個轆，一堆鐵，就成為咗一部可以幫我哋運貨嘅鐵車，看似簡單，其實亦需要心思細密嘅技巧。

當你行緊漫遊路線嘅時候，如果你想了解更多關於深水埗嘅故事，其實可以透過語音導航細聽呢度嘅故事、文化、歷史同區內嘅變遷；另外，亦有專為單車人士設計嘅路線添，不過由於我係唔識踩單車，所以我都係徒步欣賞啦！最後，行完漫遊路線，仲有免費小手信㗎！只要喺指定嘅作品影張相再上載去社交網站，就可以去到位於深水埗嘅跑緣領取精美貼紙，絕對適合帶埋小朋友一齊嚟玩啦！

世界各地／香港景點門票邊度買至平？
–> Klook：www.klook.com <–
–> Trip.com：www.trip.com <–
–> KKday：www.kkday.com <–

深水埗人_人 SSP_People
網址：www.designdistrict.hk

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com