即捉即食活海鮮放題 元朗天空之城醉辣鮮
世間上最好味一定係新鮮嘅食材，特別係新鮮生猛嘅海鮮，嗰種鮮甜味絕對係人間美食！但食新鮮嘅海鮮，荷包就要大出血？今日帶好鍾意食海鮮嘅M佬嚟到錦田天空之城嘅醉辣鮮，打破新鮮嘅海鮮就一定係貴嘅定律！呢度嘅海鮮任你揀任你捉，任食最鮮甜嘅海鮮，價錢仲要好抵食，呢個晚餐真係非常滿足。
椰子雞湯、溫泉蛋
坐低揀完海鮮套餐之後，店員就會送上老火湯，今日嘅湯係椰子雞湯，絕對無落味精，落足料，好鮮甜；溫泉蛋嘅蛋味又香又滑，但略嫌蛋黃熟咗少少。
紅棗杞子蟲草花蒸雞
店員放好粥底之好，就開始我哋嘅「蒸」路！首先蒸嘅係加入紅棗、花雕酒、蟲草花醃製嘅雞件，雞肉好入味，肉質嫩滑，味道有啲似藥膳雞，好好味！
小籠包
蒸嘅時候記住放上生菜，如果唔係啲皮就會痴實蒸架，漏晒汁㗎喇。小籠包皮薄，肉味香濃，略嫌湯汁唔夠多。
扇貝、鮑魚、海中蝦
係時候要出去揀海鮮喇！出面有幾個大魚缸，海鮮種類好多，根據你哋所揀選嘅海鮮套餐出去捕捉啦！揀完之後，就交俾店員幫你洗同劏啦，特別一讚係，呢度海鮮真係洗得非常乾淨，食得好放心！我哋所揀嘅套餐扇貝、鮑魚同海中蝦都有限定數量，其中扇貝同鮑魚好彈牙；海中蝦超生猛，蝦頭勁多膏！
沙白、花甲、大蜆
至於沙白、花甲同大蜆都係任食，粒粒都飽滿又無沙，勁鮮甜。
肉蟹
我哋呢個套餐主打就係任食肉蟹，全部蟹都勁生猛，店員洗得好乾淨，內臟清潔得好徹底。而切開咗嘅肉蟹，啲膏已經爆晒出嚟，甘香鮮甜，勁滿足！蟹肉厚實，啖啖肉。
蒸選時蔬
喺自選區有唔少蔬菜選擇，有生菜、翠玉瓜、金菇、冬菇、雞仔菇、粟米等。
海皇粥底
講到全餐飯最正嘅一定係粥底啦！所以記住留肚呀，呢煲粥集合晒海鮮、雞肉同蔬菜嘅精華，加上粥底已預先放入芋頭、南瓜同豬骨，真係好鮮甜呀！
香芋西米露
一餐飯又點少得甜品呢！店員送上香芋西米露為呢個海鮮大餐畫上完美句號。
醉辣鮮 Spicy Drucken
地址：元朗錦田高埔村110號天空之城地舖
電話：+852 6133 3882
營業時間：星期二至日 17:30 – 22:00
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
