深水埗大變天 8間深水埗文青打卡cafe推介

深水埗有文青cafe同特色coffee shop？一直以嚟，深水埗俾人嘅感覺都係售賣電腦用品、電子零件同遊戲機嘅宅男宅女天堂。不過近年深水埗除咗平民美食，喺大南街一帶亦出現多間文青cafe同特色coffee shop咖啡室，令人感覺耳目一新！啱晒大家放假嚟文青cafe同特色coffee shop嘆杯咖啡輕鬆一吓，仲可以打卡影相添，一齊睇吓我哋推介嘅深水埗8間文青打卡cafe啦！

1. 8間深水埗文青打卡cafe推介：素年
地址：深水埗汝州街132號地舖

素年嘅裝修設計行日系文青風，入到嚟會有種小清新嘅感覺，令人可以好放鬆咁嘆杯咖啡。另外，呢間cafe亦有提供花茶同自家製嘅特飲，好似芫荽檸檬梳打就夠晒清新，鍾意芫荽嘅朋友就一定唔可以錯過。除咗飲品，素年提供嘅嘢食都係素食，夠晒健康。cafe menu常見嘅漢堡、意粉就梗係唔少得，估唔到仲有糯米飯、大阪燒同手抓餅呀！

2. 8間深水埗文青打卡cafe推介：COFFEE matters
地址：深水埗基隆街170號地舖

從COFFEE matters嘅水泥牆、紙皮石地板同燈膽，就可以感受到呢間cafe以懷舊為設計特色。COFFEE matters嘅代表作係自家烘焙黑咖啡，鍾意飲黑咖啡嘅朋友絕對唔可以錯過。另外亦有提供輕食，好似牛角酥同丹麥酥，以自家製嘅英式鬆餅同蛋糕係限定供應，好快就賣晒喇！

3. 8間深水埗文青打卡cafe推介：Bonding coffee
地址：深水埗基隆街145號宏德樓地舖

Bonding coffee用上型格嘅水泥牆，以白色、灰色同木色為主調，牆上面亦掛上本地藝術家嘅畫作，cafe亦有塔羅牌玩，所以命名為「Bonding」。咖啡豆可以揀由巴西、印尼及肯亞三地拼配，帶有堅果味嘅nutty；或嚟自埃塞俄比亞及肯亞帶有淡淡花香嘅floral。除咗咖啡，Bonding coffee嘅撻係另一主打，款式多之餘，賣相仲好靚，味道仲要相當唔錯。

4. 8間深水埗文青打卡cafe推介：BOLD Coffee
地址：深水埗基隆街122號地舖

BOLD Coffee以Bold為主題，咩係Bold？未就係讀音「布」囉。喺Cafe門口掛上顏色交織而成嘅布條，色彩繽紛，有一種花花世界嘅感覺，令人開心舒暢。入到嚟除咗嘆杯咖啡或朱古力，記住唔可以錯過呢度嘅甜品呀！

5. 8間深水埗文青打卡cafe推介：一草一木
地址：深水埗基隆街102號地舖

一草一木就梗係以植物為主題啦！cafe種咗唔少植物同盆栽，而當綠色配上木系傢俬真係非常舒服架！另外，店內亦掛上代表內在情緒嘅月亮，店主希望大家可以透過一杯咖啡，讓大家好好滿足同感受自己嘅心靈。呢度嘅咖啡由兩款咖啡豆製作，所以味道好多層次。如果咖啡唔啱，呢度仲有特調茶，以檸檬馬鞭草及馬鬱蘭葉沖泡。

6. 8間深水埗文青打卡cafe推介：flow
地址：深水埗大南街195-201號興基大廈地下3號舖

如果一杯咖啡對你嚟講，唔單只係味道，仲係深度嘅話，可以選擇嚟flow。flow主打手沖咖啡，咖啡豆會不定期轉換，咖啡師亦會同你分享每種咖啡嘅特點，加深你對咖啡嘅認識，好快你就會成為下一個陳豪喇！除咗咖啡，餐廳亦提供甜品去中和咖啡嘅味道，例如人氣嘅焙茶戚風蛋糕、紫薯卷蛋、小山園抹茶卷蛋同抹茶戚風蛋糕等等，味道唔錯架！

7. 8間深水埗文青打卡cafe推介：Nobis Cafe
地址：太子界限街10G號南楓樓地下

Nobis Cafe走韓式工業風嘅設計，以水泥、水磨石、不鏽鋼等灰系材質為主色基調。雖然冷酷嘅型格感好重，但靠牆竟然種咗一棵綠色植物，極端咁帶嚟一種茁壯嘅溫暖感。嚟到Nobis Cafe除咗嘆杯咖啡，呢度嘅兩款panini，分量十足，味道唔錯，係嚟到Nobis Cafe必試嘅嘢食。

8. 8間深水埗文青打卡cafe推介：Dozy
地址：深水埗基隆街199號地舖

飲咖啡就梗係慢慢嘆㗎啦，講到嘆就係要享受慢活人生啦！Dozy就係以慢活為主題，希望香港人放鬆生活節奏，嚟到Dozy放輕鬆，嘆杯咖啡，發吓白日夢啦！Dozy擺放咗唔同嘅植物做裝飾，讓大家有暫時離開石屎森林嘅感覺。Dozy除咗提供咖啡，主食嘅火箭菜豬腩卷配特色腐乳醬係佢哋嘅招牌菜，難得一間cafe會有一樣咁麻甩嘅食物，真係必試啦！

大南街 Tai Nan Street

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com