泰式主打EYT 歡樂今燒BBQ

近期因為武漢肺炎喺香港蔓延,我哋都係留喺屋企,唔太想出街,但真係坐到發霉,所以就搵啲戶外活動同M佬去行吓。今日就同M佬揸車去燒吓嘢食啦,任食燒烤場有唔少選擇,但呢間位於上水嘅歡樂今燒BBQ就主打泰式燒烤,一於試試啦。

首先,同一般燒烤場一樣,入場要先買飛,店員會俾飲品券同物品券你,再幫你透爐。但唔知係未新開關係,呢個部份有啲混亂,首先等咗接近10分鐘,終於等到有人嚟收錢,但收完錢又無俾飲品券同物品券我哋,就走咗,又等多5分鐘,等到佢返嚟,佢又以為俾咗。去攞用品,點知負責同事又唔見咗;而幫你透爐嘅,啲炭都未燒著,就走咗。點解啲人會成日唔見咗又走咗?因為農曆新年前後,所以好多員工放假,所以嗰兩三位員工收完錢又趕住去透爐,透完爐又趕住去分發物品,好彩當日燒烤嘅人唔多,希望之後嘅安排會更好更順暢啦。

呢度嘅燒烤嘢食全部都放喺雪櫃自取,而重點嘅當然係泰式燒烤啦,呢度嘅肉類由泰國大廚主理,以唔同嘅泰式醬料醃製,包括泰式沙嗲醬、甜辣醬兒童口味、豬頸肉醬、泰式wasabi 汁、中辣、大辣醬等。燒完仲可以加上泰式醬料呀添!

雞翼
燒嘢食又點少得雞翼,平時燒雞翼都係蜜糖、蒜蓉同黑椒,呢度就有冬陰功、青咖哩、香茅同薑汁,醃得好入味。

豬仔髀
憑券可以換領羊架或豬仔髀一份,我哋兩個都唔食羊,所以都揀咗豬仔髀。豬仔髀好嫩滑,而加上佢嘅秘製醬汁,更突出佢嘅香濃肉味。

其他選擇
而雞扒、豬扒同豬頸肉都用泰式醬料醃製,好有新鮮感。除此之外,仲有我哋燒嘢食常見嘅一口牛柳粒、雞腎、魷魚、丸類同腸仔,選擇非常多。

蔬菜包
蔬菜嘅選擇有什菜包、金菇、粟米同蕃薯,細心加上牛油同包好晒,食得夠晒方便!但每包份量唔多,仲要每人限攞兩包,想幫人攞埋都話唔得,呢個位就孤寒咗少少,希望可以改善吓啦。

歡樂今燒BBQ
地址:上水石湖新村280號地下
營業時間:星期一至五 18:00 – 23:00;星期六、日及公眾假期 13:00 – 23:00
電話:+852 6708 7337

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
大眾點評:A姐M佬
Trip Advisor:AandMDiary
Youtube:A姐M佬玩樂日記
報料或合作:keepintouch@aandmdiary.com

Leave a Reply

Your email address will not be published. Required fields are marked *