越南越愛 旺角越滿

M佬:A姐呀,今晚可唔可以唔食日本嘢呀?
A姐:咁食韓國嘢啦!
M佬:可唔可以食東南亞嘢呀?

話說,近排真係食咗好多日韓菜,而最難得係A姐一啲都唔嫌,但我真心想轉轉菜單,所以今日A姐大發慈悲同我食越南菜,見呢間位於旺角嘅越滿嘅網上評價都唔差,仲要唔駛加一,一於去試試啦!

河內魚餅

3件切半嘅魚餅,同一般嘅越式魚餅唔同,因為坊間嘅魚味唔夠濃,而呢度嘅魚味超鮮,估計係用新鮮魚制作。除咗夠晒彈牙,驚喜在於加入爽脆可口嘅馬蹄,口感好豐富。

牛油雞翼

三大隻雞翼,我同A姐點分先?一定係我讓佢架啦!呢隻雞翼嘅炸得好鬆脆,而雞肉就夠晒滑,最重要係牛油味適中,又唔會太油,可惜,我只得呢一隻。

鮮蝦米紙卷

去親食越南菜,呢個都係我必點之物。透薄嘅米紙包住九層塔、生菜、芽菜、檬粉、青瓜條、蘿蔔絲、花生碎同一隻鮮蝦,點埋特制嘅魚露汁,好清新好開胃呀!

越滿和牛湯河

冬天食越南嘢,又點少得Pho呢?而呢碗越南河粉用上日本和牛,咁係日本菜定仲係越南菜呢?真係食過先知!呢碗越滿和牛湯河,夠晒分量,2個人都夠食!和牛湯河包括日本和牛、澳洲和牛、和牛牛舌、美國牛小排同牛丸,而配料有洋蔥、蔥花、芽菜同九層塔等。上枱後,店員會喺我哋面前倒下熱辣辣嘅牛湯,再靠湯嘅溫度將和牛煮熟。湯底嘅牛肉味好香濃,而牛肉就夠晒鮮嫩!最估唔到嘅係牛丸都相當驚喜,夠晒彈牙,仲係懶尿牛丸。

燒豬扒撈檬

而A姐話今日無乜胃口,所以別咗碗撈檬,配上特制嘅魚露汁,撈埋酸酸尾尾,夠晒開胃!

越滿 The Pho
地址:旺角洗衣街111號建煌華廈地舖
營業時間:星期一至日 11:30-00:00
電話:+852 2392 2368

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
報料或合作:keepintouch@aandmdiary.com

Leave a Reply

Your email address will not be published. Required fields are marked *