隱世懷石料理數碼港奧壽司

沿住南區海岸線遊車河，綠蔭山林，無際海洋，沿途風景真係好靚。如果可以望住如畫嘅風景，嘆番餐好嘅就更加係一流嘅配搭！嚟到數碼港，除咗方便泊車人士，仲有一間主打懷石料理嘅奧壽司，就算無車人士都絕對值得坐車入去享受一餐。

奧壽司

奧壽司嘅前菜有三點：鵝肝脆方、蟹肉果凍、清酒煮鮑魚。鵝肝入口即溶，味道甘香醇厚，配上烤過嘅法包，一軟一脆，口感豐富；將高湯凝固成蟹肉果凍，口感非常獨特，而果凍當中嘅蟹肉亦非常鮮甜，非常開胃；用上清酒烹調嘅鮑魚，十分軟身而且帶有淡淡嘅酒香，極具層次。

刺身會按時令食材安排，而且估唔到奧壽司嘅刺身咁豐富：牡丹蝦、鱆紅魚、油甘魚、三文魚、池魚、墨魚、海膽、帶子、三文魚子，全部都非常鮮甜。其中油甘魚同三文魚嘅油脂豐富，非常驚喜；油甘魚同池魚嘅魚香味香濃，齒頰留香；但最鍾意都係海膽，非常甘香濃郁呢！

奧壽司嘅酒菜部份有鯖魚、厚燒玉子、海老。其中鯖魚肉質厚實緊緻，魚油豐盈；海老新鮮彈牙，帶有膠質口感；厚燒玉子表面呈脆面焦糖，加上微酸嘅柚子醬，酸酸甜甜，非常醒胃。

食到半飽，原來仲有主食嘅蜆肉椎茸菰豚肉釜炊飯。一打開鐵鍋已經係撲面而來嘅椎茸菰香氣，而吸滿高湯嘅米飯混合脆口鍋巴、爽口蜆肉、軟嫩豚肉，滿滿嘅幸福隨之而來。

奧壽司嘅甜品係紅豆抹茶果凍，由微苦清香嘅抹茶和綿密香甜嘅紅豆組合，加上煙韌嘅蒟蒻、軟滑嘅果凍，令口感層次更加豐富。

餐廳名稱：奧壽司 Oh Sushi and Tappas
地址：薄扶林數碼港100號數碼港商場3樓307號舖
營業時間：星期一至日 11:30 – 15:30、17:30 – 23:30

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！