錦田好去處

親手摘士多啤梨錦田鄉村俱樂部

平時去超級市場，相信你哋同A姐一樣，對日本、澳洲嘅食材，特別情有獨鍾。但其實香港都有唔少本地漁農產品，因為唔使長途運輸，所以食材比較新鮮，而且品質都唔錯，值得大家支持。每年嘅12月中至4月頭都係港產士多啤梨嘅季節，今日我哋就去到錦田鄉村俱樂部，親手摘士多啤梨啦！

錦上路港鐵站係一個好特別嘅地方，因為平時一落車，就會有一個毗鄰港鐵站嘅大型商場或者屋苑。不過嚟到錦上路站，旁邊就係一個假日跳蚤市場，而其他地方就充滿小鎮風情，成個人都好似輕鬆咗，腳步都放慢左，一齊感受一下錦上路站嘅好玩之處啦！由車站行大概5分鐘，就會嚟到其中一個景點：盈匯坊。